Sîyasetmedara kurde Aysele Tugluk 3 rojan Serekîya Heyetê Îhtîsasî ya Çimdarîye ya Dezgehê Tipê Edlîyî de mende û dima erşawîyaye Zîndanê Kandira.

Avûkata Aysele Tugluk Reyhane Yalçindage proses ANFyî rê ercna.

Yalçindage pare kerd ke bi qerarê mehkeme qala 3 hewteyan amebî kerdene û vat: ''Seba ke rewşa muwekîla mi bêra tesbîtkerdene 3 rojî zî bes ê. Ez bi xo zî zanena ke rewşa ci çend giran a. Roja şemeyî pêvînayîş de a zaf qefilîyaye bîye.''

Yalçindage bale ante ser ke kanûne de 7 cenazayî zîndanan ra vejîyayî û hem zî zîndanan de zaf tepişteyê nêweşî estê. Yalçindage vat: ''Derheqê tepişteyanê nêweşan de raporê ke hetê Komeleya Heqanê Merdiman (ÎHD) û Weqfa Heqanê Merdiman a Tirkîya (TÎHV) ra ameyê dayene, pêşkêşê Wezîrîya Edaletî û Wezîrîya Weşîye ameyî kerdene la reyna zî qet yew game nêameye eştene. Tepişteyê nêweşî yew bi yew dinyaya xo bedilnenê. Tayê înan hucreyan de bi hawayêkê şikdarî mirenê. Yew eleqeyê ney bi huqûq, wijdan û erjanê merdimîye çin o.''

Yalçindage îfade kerd ke merdimê ke nêweşîyê winasênaî yê înan estê  ganî tedawîya îna teber de dewam bikera û ganî Tugluke bêra veradayene.