Endama Meclîsê Partîye ya HDPyî Zelal Yerlîkaya derheqê hêrişanê dewleta tirke yê vera cinîyan ê kurdan de qisey kerd.

Yerlîkaya ard ziwan ke cinîyê kurdî seba ke îdeolojîya xelisnayîşê cinîyan afernaye, tim benê hedef. Yerlîkaya îfade kerd ke leşker û polîsê dewlete Vakurê Kurdîstanî de qestî ra tecawuzê cinîyan kenê û vera cinîyan şîdet kenê. Yerlîkaya vat: ''Vatişê tecawuzker Musa Orhanî 'Dewlete paştî dana mi' vîrê her kesî de yo. Manaya na cumle na ya 'dewlete mi pawena.'  Kulturê tecawuzî bi îdeolojî û tesîrê dewletan. Bi tecawuzê cinîyan mesajê qesasî yeno dayene. Dewlete bi nê hawayî vana ke a do heqanê ciwîyayîşî nêda înan.''

Yerlîkaya bale ante cinîyanê ke wayîrê hîşmendîya dewlet ê ser û pare kerd ke nê cinîyî camêrdan ra zêdêr bitehluke yê. Yerlîkaya vat: ''Cinîyê ke nasnameyê cinîya azade pawenê û temsîl kenê ya tepişte yê yan zî qedexekerde yê. Ê cinîyê ke teberê nê nasnameyî de yê  seke mîrê camêrdan ê. Sey Tansu Çîller û Meral Alşener nê cinîyî prototîpê dewleta camêrd ê. La cinîyê sey Fîgene Yuksekdag, Selma Irmak, Gultene Kişinakê ke binê teda û zorbazîya îqtîdarî de vera dîyayî, ameyî mehkumkerdene. Sîstemê hêrişê cinîyanê ke teberê nasnameyê cinîya azade de manenê nêkeno. Na hîşmendîya dewleta camêrd a.  Hêrişî vera nasnameyê cinîya azade yenê kerdene. Partî û sîyasetmedarê Tirkîya qebul nêkenê ke hetê têdûştî û azadîye ra cinîyî wayîrê destkewteyan bibê. Ê wazenê cinîyî bimanê camêrdanê dewlete.''

Yerlîkaya da zanayene ke tecawuzê bi destê leşkeran mojneno ke kurdî polîtîkaya şerê taybetî ya vera şarê kurdî îsbat keno û vat: ''Kulturê carîye û tecawuzî vera cinîyan ê kurdan yeno caardene.  Mekanîzma û dezgehê dewlete pêro bi sîstematîkî goreyê hewcedarîyanê şer û raştîya mîlîtarîzmî têgêrenê.  Sîstemê dewlete sond werd ke verê îdeolojî, têkoşîn û xoverdayîşê cinîyan bigêro. Dewlete do bi nîjadperestî, pederşahî, mîlîtarîzm, dînperestî û bi konseptanê cîya-cîyayan hêrişanê xo dewam bikera.''