Koordînasyonê Yewîya Cinîyan ê Ciwanan ê Rojhelatê Kurdîstanî (YJCR) derheqê Hemleya 'Ma vanê NÊ' ya Komeleyan Cinîyan ê Ciwanan de eşkerayîyêke weşanaye.

Koordînasyonî da zanayene ke ê tewrê  Hemleya 'Ma vanê NÊ' ya Komeleyan Cinîyan ê Ciwanan benê. Koordînasyon pare kerd ke ewro Kurdîstan û cinîyî benê hedefan. Koordînasyonî nale ante kerdişanê rejîmê Îranî yê vera Rojhelatê Kurdîstanî ser û ard ziwan ke rejîm vera cinîyan û komelî teda keno. Koordînasyonî eşkera kerd ke eke cinîyî bi hawayêkê hemparî vera rejîmî vejîyê eşkenê verê hêrişan bigêrê. 

YJCRyî peynîya eşkerayîya xo de bale ante tecrîdê vera Rayberê Şarê Kurdî Abdullah Ocalanî ser û venga cinîyan da ke vera tecrîd, faşîzm, îşxalî rîyê xo bizivirnê koyan.

YJCRyî vat: ''Ma verê sîstemê qirkerdiş û çinkerdişê cinîyan bêçare nîyê. Seke Rayber Apoyî zî vatbi xeylêk alternatîfê têkoşînî estê. Ma merg nê la ciwîyayîş weçînenê. Sîstemo serdest seba ke felsefeya cinîyan a Rayber Apoyî çin bikero vera Rayberê ma tecrîdêkê mutkaqî ano ca. Heta ke no tecrîd dewam bikero cinîyî do bibê qels û azad nêbê. Ganî her cinîya ke wazena azad biba, vera tecrîdê Rayber Apoyî têkoşîn bikera, wurza payan ser. Ganî cinîyî goreyê fikr û felsefeya Rayber Apoyî xo rêxistin bikerê. Ma nê esasî ser o venga pêro cinîyan danê ke seba ke peynîya îşxal, faşîzm û tecrîdî bîyarê sere wedarê û rayîrê cuya azade biweçînê. Seba naye zî ma vanê ke wext wextê cuya azade û gerîlatîye yo.''