YPJ: Fermandare Arjîne Kobanê şehîde bîye

Fermandarîya Pêroyî ya YPJyî eşkera kerd ke xoverdayîşê vera hêrişê îşxalî yê vera Awbendê Tişrînî de Fermandare Arjîne Kobanê şehîde bîye.

Fermandarîya Pêroyî ya YPJyî eşkera kerd ke xoverdayîşê vera hêrişê îşxalî yê dewleta tirke ya îşxalkere yê vera Awbendê Tişrînî de fermandaranê YPJyî ra Arjîne Kobanê 21ê çeleyê 2025î de şehîde bîye.

Eşkerayîye de nê ameyî vatene:

"Xoverdayîşê şar û şervanan ê Rojawanî morê xo da tarîxê têkoşînê azadîye ro. Têkoşînê ma yo heqdar ê serkêşîya YPJyî derbanê giranan dano dewleta tirke û çeteyanê ci ro. Dewleta tirke semedê îşxalkerdişê herra ma grûbê paramîtîler û çeteyî seferber kerdî la xoverdayîşê Awbendê Tişrînî û Pirdê Qereqozaxî hesabê îşxalî yê dewleta tirke serûbin kerdi.

Nê xoverdayîşê tarîxî de qehremanîye û fedakarîye azadîya şarê ma kerd qetî. Fermandara ma Arjîne Kobanê bi bawerîya girde û bi hewayêkê qerardarî destur nêda xîyalê îşxalkeran bêrê caardene û xoverdayîşê YPJyî yê vera îşxalkeran mojna ra.

Fermandara ma Arjîne Kobanê 1984 de bajarê xoverdayîşî Kobanê de keyeyêkê welatperwerî de yena dinya û bi erjanê welatperwerîye bena pîl. 2001 de tewrê refanê Têgêrayîşê Azadîye yê Kurdîstanî bena û heta 2011yî koyanê Kurdîstanî de bi keda pîle û fedakarîye têkoşîn kena û dima ra verê xo dana Rojawanê Kurdîstanî. Bajaranê cîya cîyayan ê Rojawanî de xebatanê ciwanan rayra bena û bi destpêkerdişê şorişî xebatanê stretejîkan û muhîman rê serkêşîye kena. Fermandare Arjîne bi tecrubeyanê xo sey fermandara YPJyî îdelojîya azadadîya cinîyan de bena serkêşêka nimûne. Fermandare Arjîne xeylê şervanî perwerde kena û  Awbendê Tişrînî de bi ruhê xoverdayîşê Kobanê şer kena. 21ê çeleyî de sey qehremane tewrê kerwanê bêmergan bena.

Ma sere de keyeyê erjîyayeyî yê fermandare Arjîne rê, heme şarê xo yê welatperwerî rê serweşîye wazenê. Ma do sey şervananê YPJyî waştişê şehîdanê xo bîyarê ca. Xoverdayîşê Awbendê Tişrînî û Pirdê Qereqozaxî do bi serkewtişî bêro tacîdarkerdene.

Nasnameyê şehîde wina yê:

Nameyê Qodî: Arjîne Kobanê

Name û Peyname:Edla Mixarî

Nameyê Dadîye: Îda

Nameyê Babîyî: Şevket

Ca û Tarîxê Şehadetî: 21.01.2025/ Awbendê Tişrînî