Fermnadarîya Pêroyî ya Yewîyanê Pawitişî yê Cinîyan (YPJ) embaza xo Zîn Kobanê ya ke 13'ê Teşrîna Verêne de herêma Silûkê de hêrişanê îşxalkarîya dewleta Tirkî de şehîd bîya, bi eşkerayîyêke yad kerde.

Eşkerayîya YPJ'yî wina ya:

"Serra 2011 de wexto ke şorişê ma bezreyê xo da, embaza Zîne bi tewrbîyayîşê xo yê mabênê şorişî bîya dendika yewîne ya destpêkerdişê têkoşînê cinîyan. Emzaba Zîne serra 11 de şaristanê Kobanê de verê xo da xoverdayîşî. Efrînî ra heta Dêrikî, 9 serre roşn daye têkoşînê cuye. Embaza Zînê keyeyêko welatperwer de bîye pîl, serra xo ya qijkeke de pê rastîya dejanê yê şarê xo hesîyaye. Bi nê pêhesîyayîşan, qerar da ke bibe têkoşînvane û raybera şarê xo. Destpêkê şorişî de kedêka pîle seba rêxistinkerdişê şarî, ciwanan û tewrbîyayîşê cinîyan ê mabênê şorişî daye. Zerrîya xo hem zehmetîyanê şarê xo ra akerde hem zî hêvîyanê şarê xo ra tim bîye çimeyê moralî û hêzî.

Serê nê bigeyî de ma sey yewîyanê pawitişî yê cinîyanê YPJ'yî vanê, heta ke ruhê Şevînan, Hebûnan, Rosyaran, Tekoşîn, Avêsta û Zînan mezgeyê zerrîya ma de xo zîl bikê, têkoşînê ma do dewam bike. Her ke ma şehîdêke danê, wezîfe û berpirsîyarîyê ma ya seba azadîya şaran benê zêdêr. Ma pê nê zanayîşî, pê na berpirsîyarîya tarîxîye şehadetê embaza Zîne û ê pêroyê şehîdan ê xoverdayîşê rûmetî yad kenê. Şehîdanê ma reyna fermanê cuya birûmet daye ma. Ma zî seba ke wayîrê nê fermanê şehîdan bivejîyê, çi bedelo ke ma ra bêro waştene, ma amade yê ke bidê. Ma şexsê Şehîde Zîne de pêroyê şehîdanê şorişê azadîye û şehîdanê Xoverdayîşê Rûmetî yad kenê. Embazanê xo yê birîndaran rê şîfa wazenê. Şarê ma yê Vakur û Rojakewtena Sûrîye û keyeyê embaza Zîne rê serweşîye wazenê."