Endama Heyetê Rayberdişî yê TEV-DEM'î Foza Yûsife tewrê bernameyê Jin TV'yî bîye û rojdem ercna. Yûsife derheqê hêrişanê verba Rojawanî de qisey kerd û vat, qerarê adirbirnayîşî hem hetê QSD'yî ra hem zî hetê îdareyî ra sey gamêka seba qedînayîşê şerî û qirkerdişî ame destgirewtene. Yusifê ard ziwan ke Îdareyo Xoser o Demokratîk wazeno ke her tim meseleyan pê rayîrê dîyalogî çareser bike û vat, "La dewleta Tirkî tim terefgira şerî ya."

Foza Yûsife va:''Serêkanîyê û Girê Spî de zafê sivîlî ameyî qetilkerdene û sucê şerî ameyî kerdene. Seba ke verê naye bêro girewtene gamêka winasêne ameye eştene. Her çiqas ame zanayene ke dewleta Tirkî goreyê ci tê nêgêre, ma goreyê ci tê gêrayê û çi ame waştene ma ard ca. QSD'yî şertî ardî ca la dewleta Tirkî hêrişanê xo rê dewam kerd û kena. Dewleta Tirkî bi adirbirnayîşî waşt ke kiştişê vîlan kamufle bike û hem zî tedaya DYA û tedaya rayaumûmîya serê Trumpî sist bike. Şar bîyo koçber. Bi se hezaran kesanê ke Girê Sipî û Serêkanîyê ra koç kerd, kampî ameyî sazkerdene. Zimistanî ra zorîyî vejîyenê meydan.

Eşkerayîyê Trumpî berê qirkerdişî û pakîya etnîke Tirkîya rê akenê. Ganî ma bi garantorîya mîyanneteweyî de abigêrê keye û cayanê xo. Yan zî pakîya etnîke û qirkerdişî do bibê. Eşkera yo ke çekanê Erdoganî verba domanan û cinîyan yenê xebitnayene. Nika Serêkanîyê de uca de DAÎŞ pê nameyêko bîn cayê xo gêno. Ê sere de Kurdan her kesî sey dişmen vînenê. Keyeyê hemwelatijan rijnenê, dest nanê serê keyeyan. Roja awile ra nata sucê şerî ameyî kerdene. Fosfora sipîye û nepalm ameyî xebitnayene, înfazî ameyî kerdene. Derheqê nê sucan de ma dosyayî amade kerdî, komîsyonêke ameye sazkerdene. Na komîsyone cayanê ke hewce keno de, zîyaretan do bikê. Dewa do bêra akerdene û ma do têkoşînê xo yo huqûqî rê dewam bikê. Senî ke ma heqê xo yo meşrû anê ca, wareyê pawitişê huqûqî de zî ma do têkoşînê xo bikê."