Zelîha pê cesaretê xo ser kewte

Zelîhaya ke nika dikanê tantunî dana xebitnayene, ard ziwan ke semedê karê keyeyî têkilîya aye ya bi teberî birîyabî û vat: "Ez venga cinîyan dana ke wa peyê xeyalanê xo de şorê. O çax şima do qetî serbikewê."

Serkewtişê cinîyan rayîrê cinîyan ê bînan akeno û yewbînan ra cesaret gênê. Cesareto ke vila beno serkewtiş zî xo reyde ano. Nînan ra yew zî Zelîha Ozkul (48) a ke bi viraştişê tantunî debara xo kena. Zelîhaya ke bi serran o tena karê keyeyî de eleqedar bîya, nika zî dikanê xo yê  tantunî akerd û cesaret dana xeylêk cinîyanê derûdorê xo.

Zelîha wina qala destpêkerdişê karê xo kerde: "Ez her wext şîyêne Mersîn û ameyêne. Cîranêka mi uca de karê tantunî kerdêne. Ez xeylêk rey şîyêne verê ci û mi hetkarîya ci kerdêne. Bi nê şiklî viraştişê tantunî musaya. Dima ke ameya Amed, mi qerar da ke ez nê karî bikera. Şarî mi rê vat 'emrê to pîl o, ti nêeşkena ser bikewa.' Labelê ez pey waştişê xo şîya. Ez viraştişê werdî ra xeylêk hes kena. Werdê mi hetê xeylêk kesan ra yenê ecibnayene. Mi zî cayê tantunî akerd. Bêguman destpêk de mi zehmetî ante. La nika êdî êdî karê mi nişt ro û qasê ke destê mi ra yeno hewl dana ke debara xo bikerî. Labelê tantunî reyde paça û şorbeya nîske û arayî zî dana. 

Semedê karê keye û weyekerdişê tutan mi îmkan nêdî ke teber a bixebitîya. Ez bi serran zereyê keyeyî de menda. La nika çiqas emrê mi pîl bo zî ez teber de ya û karê teberî de eleqedar bena. Ez xeylêk kêfweş a û bi kelecan a. Gama ke werdê mi hetê muşterîyan ra yenê ecibnayene, xeylêk kêfê mi yeno."

 Zelîha heta nê wextî pewtişê werdî reyde xeylêk çîyanê bînan de zî eleqedar bîya. Zelîha vat: “Ez her tim mîyanê cigêrayîşî de bîya. Mi perwerdeyê kuaforî zî girewtibi. Ez zaf xêzkerdişê resiman ra hes kena, no çî zereyê mi de mendo. Mi tim waştêne ke serê dêsê dikanî de resiman viraza."

Zelîha tewr peyîn wina vat: "Mi bi karê xo cesaret û hêvî da derûdorê xo. Gama ke merdim karê xo ra hes bikero, do her wext serkefte bibo. Cinîyê ke zereyê keyeyî de manenê tim aciz benê û cuya teberî ra visîyenê. Gama ke mi dest bi karê esnafîye kerd, xebera mi cuya teberî ra bîye. Ez veng dana cinîyan ke wa peyê xeyal û waştişanê xo de şêrê."