Endama Konseya Hemserekîye ya KCKyî Zilare Stêrk bi wesîleya serrgêra 22. Komployê Mîyanneteweyî yê 15ê Sibate ANFyî rê ercnaye.

Qiseykerdişê Zilare Stêrk ra beşêk wina yo:

''Rayber Apo Zîndanê Îmraliyî de 22 serrî yo xo ver dano. Mumkîn nîyo ke merdimêk hende daymîşê sîstemê îşkenceyî bibo. Coka ganî Rayber Apo têna sey 'şexsêkî' nêro ercnayene. Hêzanê komplogeran waşt ke heta nefesê xo yê peyênî Rayber Apo mehkumê hucreyêkî bikerê û emrê ci pê îşkenceyî derbaz bibo. La Rayber Apo rojêke zî teslîm nêbi. Her nefesê Rayber Apoyî çarenûsê kurdan eşkera keno. Her nefesê Rayber Apoyî sîyasî yo.

Her kes şino zêdêr merdimî tewrê Hemleya 'Wext Wextê Azadîye yo' benê. Teşrîna peyêne ra nata tepişteyê dewaya PKK û PAJKî grevê vêşanîye kenê, Kampê Lavrio û Mexmûrî zî grevê vêşanîye de yê. Nê şarê ma yê kampan binê pêro şert û mercanê giranan de zî xo ver danê, wayîrê Rayber Apoyî vejîyenê. Kurdî zî her cayê dinya de rixmê janî çalakîyanê xo dewam kenê. Hemleya ma roje bi roje bena pîlêr.

Kampanyaya 'Ocalanî rê Azadîye' ya sendîkayanê îngilîstanî zî roje bi roje bena pîlêr. Sendîkayê winasênî keda pîle danê azadîya Rayber Apoyî.Afrîkaya Başûre de zî sendîkayan kampanyaya mektuban daye destpêkerdene. Reyna Îtalya, Norweç û Swêdî de seba azadîya Rayberê Şarê Kurdî kampanyayî dewam kenê. Pêro dinya ra şorişgêr, demokrat, nuştox, akademîsyen û aktîvîstî tewrê kampanyayanê seba azadîya Rayber Apoyî benê. Na sînerjî seba ma hêzanê demokratan hêvî ya. Xîretê ercîyayeyî yê winasênî seba azadîya Rayber Apoyî rolêkê pîlî anê ca.

Rayber Apo rojdemê xo têna pê meseleya kurdan sînordar nêkerd. Rayber Apo çareserîyanê kaos û krîzan nîşan keno û bingeyê modernîteya kapîtalîste analîz keno. Rayber Apoyî fikrê xo yê komelê demokratîkî pêşkêşê merdimîye kerd û kesê ke no teorî fam kerd wayîrê Rayber Apoyî vejîyenê.

La hema zî nê fikrê Rayber Apoyî zêdêr nêzanîyenê. Her çi ra ver semedo ke fikrê Rayber Apoyî meseleyanê komelî çareser keno her kes wayîrê Rayberîye vejîyeno.''