Zîndanê Cinîyan ê Amedî de sey xeylêk zîndananê bînan wextê janî de binpaykerdişê heqan her roje zafêr benê.Tepişteyan da tengayîya ke ancenê bi metubêk Hemsereka Pêroyî ya ÎHDyî Erene Keskîne rê şawit. Mektubo ke bi morê 12 cinîyan ameyo nuştene de yeno vatene ke bitaybetî pîya janî caardişê 12ê êlule ra wetêr kewtî dewre.

Tepişteyan vat: ''Binê nameyê tedbîrî de nêzdîbîyayîşê ke anorî şiknenê yenê kerdene, weşîya  ma xeymê înan de nîya û heqê ma yenê bipaykerdene. Nêverdenê ma nefes bîgerê. Aktîvîteyê sosyalî, warê hempare bi mengan o ke qedexeyê. Pêvînayîşê qefilyayeyî bi kesêkî/e sînorkerde yê. Pêvînayîşê avûkatan yenê goştarîkerdene. Rixmo ke embazê ma yê nêweşê kronîk estê hewte de rayêke doktor/e esto/a.

Wextê sewqan de kelemçeyê çutî yenê caardene. Hem destî yenê kelemçekerdene hem zî pê kelemçeyê bînî ma yewbînan rê girê danê. No eynî wextî de rîyê janî ra cuya ma fîneno tehluke. Rîyê nê caardişî ra nizdê serreke yo ma nêşinê mehkeme û nêweşxane. Bi nê tewirî heqê ma yê xopawitişî destê ma ra yeno girewtene. Reyna tay embazê ma yê ke rixmê kelemçeyanê cutan şinê mehkeme ya zî nêweşxane seba ke rînganê sey tabûtan ê yewkesan de yenê berdene bêhewayîye ra rewşa înan xirab bena û  peyser agêrenê.

Her roje 24 saetî warê cuya yê ma pê kamerayan yenê teqîpkerdene. Kameraya cayê hewagirewtişî ra cayê kewtiş û tiwaletî eseno. Ma nayî sey tacîz  û cuya taybete rê hêriş vînenî. Pîya bi înan her hewte saetanê cîya cîyayan de kewnê koguşan cigêrayîşan kenê. Dekewtişê zîndanî de embazanê ma cigêrayîşê rutî ra ravêrnenê.

Hewceyanê ma yê esasîyan nêdanê. Wextê karantîna de zî wina yo. Tay embazê ma seba ke pede nêdîyenê, wextê reglî de kincanê xo dirnenê û şuxulnenê. Dayîkî pîya bi domananê xo hucreyan de yenê tepiştene. Kitabî sinorkerde yenê dayene û heme kitaban rê destur nêdîyeno. Nê verdenê teberî ma rê çîyêk bêro ke ma her çî kantînî ra bihernê. Xora zaf çîyê ke ma rê lazim ê kantîn de çîn ê. Çîyê bêkalîte zaf vay roşenê. Reyna faturayê xurtî yê ceyranî yenê. Caardişê keyfî yenê caardene û heme heqê ma yenê binpaykerdene.''