Serkêşîya Endama Partîya Komunîste ya Fransa Senatore Laurence Cohen de 102 wekîlanê partîyanê cîyayan ê Fransa derheqê gefanê îşxalî yê dewleta tirke yê vera Rojawanê Kurdîstanî de deklarasyonêk amade kerd. Deklarasyon de ame îfadekerdene ke Erdogan şerê Ukrayna-Rûsya xo rê keno firsend û wazeno hêrişê kurdanê Sûrîye (Rojawanê Kurdîstanî) bikero.

Wekîlan da zanayene ke herêmanê binê kontrolê Îdareyê Xoserî yê Rojawanî de, rixmê şertanê xiraban zî şarê ereb, kurd, sûryanî, keldanî, armenî pîya ciwîyenê û nê şarî xo rê sîstemêkê demokratîk, femînîst û ekolojîk birêxistin kenê.

Wekîlan vist vîrî ke dewleta tirke 2019 de Girê Sipî û Serêkanîyê îşxal kerdê. Wekîlan vat: ''Wa welatê Ewropa sûcanê şerî û binpaykerdişanê artêşa tirke mîyan nêkerê. PKK û YPGyî vera DAÎŞî şer kerd û têkoşînê înan dinya bi pozîtîfî amebi ercnayene.

Na rewşe ma pêroyînan eleqedar kena. Ma ganî meverdê ke Erdogan reyna hêrişê mutefîqanê ma bikero. Ma xo vîr a nêkerê ke herêmanê Îdareyê Xoserî de cîhadîstî ca bibê. Eke operasyono newe yê Erdoganî bêro tesdîqkerdene no yeno manaya bêaramîya herême û tehlukeyê vera asayîşê Ewropa. Ganî asayîşê dezgehanê kurdan û aktîvîstanê kurdan zî Ewropa de bêro caardene. Ma sey wekîlanê Fransa polîtîkaya şerî ya Erdoganî şermezar kenê û venga serek û selahîyetdaranê Ewropa danê ke wayîrê tewirêkî bibê.

Seba ke warê hewayî yê Rojanî bêro qedexekerdene û kurdê Sûrîye asta mîyanneteweyîye de bêrê pawitene, ma sey 102 wekîlanê Fransa venga dewletanê endamanê Yewîya Ewropa û Fransa danê ke Konseya Asayîşî ya Neteweyanê Yewbîyayeyan de prosedûrê lazimî bidîyê destpêkerdene û seba çareserîyêka mende ya herême statuyê Îdareyê Xoserî yê Rojawanî bêro şinasnayene.''