Platformê Dezgehanê Demokratîkan ê Cemîyetê Rojnamegeranê Başûrojhelatî (GGC) eşkerayîyêke daye. Hemserekê DBPyî Keskîn Bayindir û xeylêk temsîlkarê rêxistinanê komelê sivîlî tewrê eşkerayîye bîyî. 

Platformî da zanayene ke Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' dest pê safhaya bîne kena. Platformî pare kerd ke na çarçewe de heta 13ê teşrîna verêne çalakîyî do bêrê kerdene û sey fînalî Amed de zî mîtîngêko pîl bi şîarê ''Ma do vera komployî xo ver bidê, ma seba azadîye Amed de kom bibê'' bêro kerdene.

Platformî eşkerayîye de vist vîrî ke faşîzmê AKP-MHPyî sey wextê Darbeya 12ê Êlule tedayanê giranan keno û hêrişanê giranan keno. Eşkerayîye de dîya zanayene ke îqtîdarê AKP-MHPyî komel de bi rayîrê tecrîdî nefesêk nêverdayo û komel esîrê xizanîye kerdo. 

Plarformî ard ziwan ke bi hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' û bi têkoşînê hemparî yê kurdan, demokratan û şorişgêran faşîzm do bieşko birijîyo.

Platformî vat: ''Hemleya Azadîye teşrîna verêne de kewena serra xo ya diyîne. Nika ra pey ma safhaya na hemle ya newîye danê destpêkerdene. Ma heta 13ê teşrîna verêne na çarçewe de çalakîyan bikerê û dima Amed de mîtîngêkê pîlî bikerê. Ma do 13ê teşrîna verêne de bi şîarê 'Ma do vera komployî xo ver bidê, ma seba azadîye Amed de kom bibê' kom bibê. Ma vera ferzkerdişê koletîye yê komployan biqîrê û vajê 'Bê azadîye qetî nêbeno.' Wa serkewtiş sozê ma bo. Darbekar, komploger û isrardarê tecrîdî do vinî bikerê û azadîye do ser bikewa.''