Ofîsê Cenevre yê Netewayanê Yewbîyayeyan (NY) de 7ê êlule de Roniştişê Heqanê Merdimanê 57. yê Konseya Heqanê Merdiman ê NYyî dest pêkerd ke do heta 7ê teşrîna verêne dewam bikero. Têgêrayîşê Dostîye yê Mabênê Şaran ê  Vera Nîjadperestîye  (MRAP)  û Komeleya Heqanê Merdiman a Kurdan a Cenevere bi sernameya ''Tirkîya de heqê merdiman-sûcê vera şarê kurdî dewam kenê'' konferansêk organîze kerd. Konferans de hêrişê dewleta tirke yê vera kurdan û tecrîdê serê Rayberê Şarê Kurdî Abdullah Ocalanî ameyî destgirewtene.

Tarîxnasanê Unîversîteya Zurihî ra Prof. Hanc Lukas Kieser, Wekîlê DEM Partî yê Amedî Cengiz Çandar û Endamê Kongreya Neteweyî ya Kurdîstanî (KNK) Adem Uzun sey qiseykerdoxî tewrê konferansî bîyî.

Prof. Kieserî bale ante Pêkerdişê Lozanî ser û vat: ''Kurdê ke Pêkerdişê Lozanî de çînbîyaye ameyî hesibnayene, a roje ra nata çar parçeyanê Kurdîstanî de raştê polîtîkaya înkarî yenê. Rixmo ke kurdî tim raştê qirkerdişan yenê, ewro bi hêzanê xo rêxistinkerdeyan hem herême de hem zî warê mîyanteweyî de dahîna zaf yenê vînayene.''

Adem Uzunî zî bale ante sîstemê îşkenceyî yê Îmraliyî ser û nê vatî: ''Abdullah Ocalano ke hetê mîlyonan ra sey rayberî yeno vînayene 42 mengî yo tira qet xeberêk nîna girewtene. Dewleta tirke ya ke Îmrali de qet huqûq nêana caardene eşkera pêkerdişanê mîyanneteweyî û Şertanê Nelson Mandelayî binpay kena. Seba ke Amerîka û welatê bînî yê Natoyî bi des serran o paştî danê dewleta tirke a vera kurdan şer kena.

Tecrîd waranê mîyanneteweyî de sey îşkenceyî yeno qebulkerdene. Hîrê serran ra zafêr o no îşkence dewam keno ke zaf tehlukeyin o. Ma rewşa Ocalanî nêzanî û zaf qesawet kenê. Raybero Kurd Abdullah Ocalan ganî cade keye û avûkatanê xo reyde pêvînayîş bikero û seba ke semedê çaserkerdişê meseleya kurdan rolê xo bîyaro serbest bêro veradayene. Ganî Konseya Heqanê Merdiman a NYyî cade heyetêk bişawo Îmraliyî û îşkenceyê serê Ocalanî wedaro. Ganî şiro Tirkîya ser ke îşkenceyî caverdo.''