Serekê Partîya Çepe Jonas Sjostedtî da zanayene ke derheqê 3 wezîran de seba ke derheqê rotişê çekanê seba Tirkîya de zanayîşê şaşî dayî rayaumûmîye muracatê Dîwanê Berzî kerd.

Sjostedtî vat: "Nêbeno ke çekê Swêdî vera kurdan bêrê xebitnayene ke înan DAÎŞ çin kerd.'' û eşkera kerd ke wezîrê Swêdî rotişê çekanê seba Tîrkîya sey malzemeyanê hetkarîye mojna û bi nê hawayî rayaumûmîye xepînaye.

Bi nameyê Partîya Çepe Vervatoxê Polîtîkaya Teberî Håkan Svenneligî muracatê Dîwanê Berzî kerd. Dîwanê Berzî waşt ke eşkerayîyê Wezîra Karanê Teberî Ann Lînde, Wezîrê Koç û Edaletî Morgan Johansson û Wezîrê Karanê Zereyî Mîkael Dambergî yê derheqê rotişê çekan de bêrê cigêrayene.

Îşxalê dewleta tirke yê vera Rojawanî 9ê teşrîna verêne de dest pêkerd û bî semedê nêrazîbîyayîşê rayaumûmîye û bi waştişê partîyanê sîyasîyanê pêroyînan ê Parlamentoyê Swêdî hukmat neçare mendbi ke rotişê çekan ê seba Tirkîya vindarno.

Goreyê îstatîstîkan Swêdî de serra 2018î de Tirkîya rê bi erjê 298.9 mîlyon kronî çekî amebî rotene. Sere de Wezîra Karanê Teberî Ann Lînde wezîranê Swêdî îdîa kerdbi ke êyê ke ameyî rotene çek nîyê malzemeyê hetkarîye yê.La îdarekaranê Komeleya Haştîye ya Swêdî ya ke rêxistina tewr verêne ya vera şerî ya da zanayene ke wezîrê Swêdî zanayîşê şaşî danê û êyê ke Tirkîye rê ameyî rotene çek ê. Goreyê îstatîstîkanê Komeleya Haştîye Swêdî goreyê serra 2018î hîna zêdêr çekî rotî Tirkîya.

Vervatoxê Polîtîkaya Teberî ya Partîya Swêdî Sevnneligî muracatê Dîwanê Berzî de pare kerd ke her hîrê wezîran bi eşkerayîyanê xo rayaumûmîye xapînaye. Svennelingî derheqê babete de qisey kerd û vat: "Vatişê 'malzemeyanê çeke' nimitişê rastîyêk o. Têna malzemeyê çekan yan zî ê hetkarîye nêameyî rotene. Tirkîya rê programê teknolojîkî yê şerî, lewhayî û çekê bînî ameyî rotene." Svenneligî ard ziwan ke fotografî estê ke mojnenê kamyonê şîrketa Scanîa îşxalê Rojawanî de hetê dewleta tirke ra ameyî xebitnayene.