Nobeta ''Seba Ocalanî Azadîye' ya ke verê bînaya Konseya Ewropa ya Strasbourgî ya Fransa de yena kerdene kewte hewteyê 394. Çalakîya nobete nê hewteyî bi koma 4 kesan a herêma Normandîya ya Fransa dewam kena.

Kurdîstanijan bi nameyê Alî Altin, Mehmet Erzurumlu, Suleyman Koça û Huseyîn Alî Baba tewrê çalakîya nê hewteyî bîyî. Nameyê kome ser o eşkerayîyêke ameye wendene û ame vatene ke wayîrvejîyayîşê Rayberê Şarê Kurdî Abdullah Ocalanî wezîfeyo verên o. Eşkerayîye de tecrîdo giran ê Îmrali ame vîrvistene û ame vatene ke qedexekerdişê pêvînayîşan binê nameyê ''sucê dîsîplînî'' de mojnayîş bêexlaqî yo.Tecrîd vera şarê ma û Rayberê ma qirkerdişêk o. Ganî her kurd naye ser o bifikiro û bizano ke no îşkence vera şarê ci yo.

Eşkerayîye de ame parekerdene ke nobeta ''Seba Ocalanî Azadîye'' nîşanê tewirêkê birûmetî yo û girîngîya sîstemê konfederalîzmî ame vîrvistene ke Ocalan seba ameyoxê şaranê Rojhelatê Mîyanênî pêşkêş kerd. Çalakîkeran vat: "Rayberê ma, ma hîşyar kerd ma ewro vînenê ke herême vurîyaye gola gonîye. Coka wext wextê ci yo ke ma wayîrê Rayberê xo, wayîrê rûmetê xo bivejîyê."

Peynîya eşkerayîye de seba rayraşîyayîşê 11ê çeleyî yê Parisî vengdayîş ame kerdene.