Ewropa de çalakîyê protestokerdişê tecrîdî û paştdayîşê grevê vêşanîye dewam kenî. Vizêr reyna bajaranê Bern, Zurîh, Lozan, Hambûrg û Parîs de çalakîyî ameye viraştene.

BERN

Bajarê Bernî yê  Swîsre de bi çalakîyêk tecrîd ame protestokerdene û xoverdayoxê grevê vêşanîye ameyî silamkerdene. Çalakîye de derheqê tecrîd û grevanê vêşanîye de vilawekî ameyî vilakerdene û bêvêngîya Ewropa ameye şermezarkerdene. Sîyasetmedaro Kurd Demîr Çelîkî muhîmîya xoverdayîşê grevê vêşanîye ser qisey kerd û şarê Kurdî ra waşt ke hîna zaf wayîrê xoverdayoxan bivejî.

LOZAN

Bajarê Lozanî yê Swîsre de zî bi heman waştişî rayberîya Platformê Paştdayîşê Grevê Vêşanîye de Kurdistanijî û dostê înan kuçeyan de bî. Çalakwanan bi pankart û sloganan da zanayene ke waştişê xoverdayoxanê grevê vêşanîye waştişê înan o û waşt ke tecrîd bêro wedartene.

ZURÎH

Bajarê Zurîhî yê Swîsre de zî semedê baleantişê tecrîdê serê Ocalanî çalakîyêk ameye viraştene. Çalakî de ame  vatene ke waştişê Guvene  waştişê ma yê û xoverdayoxê grevê vêşanîye ameyî silamkerdene. Çalakwanan waşt ke heme mergî nêbiyê wa waştişê xoverdayoxan bêro ca.

PARÎS

Paytextê Fransa Parîs de zî rayberîya endamanê YXK’yî yê cinîyan ê ciwanan de bi çalakîyêk tecrîd ame protestokerdene û grevê vêşanîye ke rayberîya Leyla Guvene de ameyî despêkerdene ameyî silamkerdene.

HAMBÛRG

Bajarê Hambûrgî yê Almanya de zî  bi mîtîngêk tecrîd ame şermezarkerdene û xoverdayîşê grevê vêşanîye ame silamkerdene. Çalakîye de ame vatene ke waştişê Guvene waştişê şarê Kurdî yo ganî cade bêro caardene.