Nobeta Azadîya ke Strasbourg de semedê azadîya fîzîkîye ya Rayberê Şarê Kurdî Abdullah Ocalanî yena kerdene, dewam kena. Kurdîstanijê ke nobete tepişene semedê yewbîyayîşê kurdan veng da.

Sebahate Ergin: ''Ganî şarê ma yê çar leteyanê Kurdîstanî bibo yew. Wa şarê Başûrî kayanê dişmenî ya mexapîyo. Ganî ma pêro pîya vera şerê mabênê kurdan vejîyê. Gerîlayê ke ewro mewzîyan de şer kenê ê zî pêşmergeyî zî domanê nê şarî yê. Ma do heqê xo êyê ke şerê mabênê kurdan vecenê rê helal mekerê. Ganî Barzanîyî tewiranê xo yê ke xizmetê dişmenî kenê, caverdê. Wa wayîrê şar komelê kurdan vejîyî şerê mabênê kurdan red bikerê. Ma do semedê şiknayîşê tecrîdê serê Rayberîya xo zafêr têkoşîn bikerê.'

Latif Karatax: ''Sey şarê kurdî ganî ma bibê yew û pîya têkoşîn bikerê. Yewna heqê ma nêmendo. Sey heme şaranê dinya heqê ma zî esto ke ma herra xo de biciwîyê. Ma bi hezaran serrî yo herra Mezopotamya de yê. Ganî şarê Kurdîstan, Ewropa û her ca de semedê yewîya Kurdîstan wayîrê dezgehanê xo vejîyo. Bê yewîyê serkewtiş çîn o.''

Mele Mahyettin: ''Eke şarê Kurdîstanî, partîyê sîyasîyî û dezgehê ci pêro pîya têbigêrê benê bihêz. Neteweyî bi yewbîyayîş benê bihêz. Yew netewe eke pîya wirzê payan ser zalim û îşxalkerî çîn benê. Vengdayîşê mi şarê Kurdîstanî rê oyo ke bibê yew û yewbînan ra meqerfîyê.''

İmam Akgun: Welatê ma sey cayê şewatî yo û heme komelî zî nê cayê şewatî de semedê estbîyayîşê xo cehd kenê. Kurdî semedê estbîyayîşê xo ganî bibê yew. Wext, wextê yewbîyayîşî yo. Ganî ma nayî domanê xo rê mîras verdê.''