Çalakwananê Rayraşîyayîşê Dergî vat heta ke azadîya fîzîkîye ya Rayberê Şarê Kurdî Abdullah Ocalanî nêra bi ca, ê zî do nêvinderê. Ciwanan semedê paştîdayîşê mexdûranê erdlerî zî veng da.
Aktîvîstanê Rayraşîyayîşê Dergî Endama TekoJINe Berjîne Guneş û Endamê TCŞyî Demhat Akmanî, ANFyî rê qisey kerd.
Berjîne Guneş ard vîrardene ke emsar zî sey her serre ê seba azadîya Rayberê Şarê Kurdî Abdullah Ocalanî rayra şîyî û vat: ‘‘Key ra nato ke ma Rayber Apoyî ra xebere nêgênê. Ma sey ciwanê ke ewropa de ciwîyenê, nê Komployê Mîyanneteweyî qebul nêkenê. Ma her serre bê mabên rayra şinê. Emsar zî ma ciwanî, moralê ma ca der o, çunke ma biqerar ê. Ma do azadîya fîzîkîye ya Rayber Apoyî bîyarê bi ca.’’
Guneşe wina dewam kerd, ‘‘Şarê ma binê xirban de serdan ver mireno. Hetkarîyî ke gere bişîyêne, hema nêşîyî. Ma şarê xo ra wina vanê, gere ma welatê xo rê wayîr bivejîyê, gere ma nêverdê destê dewlete rê. Eke biverdê destê dewlete rê, Kurdîstan do destê ma ra şêro.
‘Heta ke ma Rayberê xo azad nêkerê ma rê hewn çîn o'
Demhat Akmanî zî vat: ‘‘Xeylê ciwanî tiya der ê. Ma ciwanê kurd tena rayra nêşinê, ma bi dostanê xo rayra şinê. Çunke Rayber Apo qederê pêroyê komelan dîyar keno. Ma bawer kenê ke demêkê nêzdî de ma do Rayber Apoyî azad bikerê. Bawerî û hêvîya ciwanan zaf a û heta ma rayberê xo azad nêkerê ma rê hewn çin o.’’
