Hêrişanê îşxalan ê Dewleta Tirkan ra dima Wezîra Karanê Teberî ya Swêdî Ann Lînde hêrişî şerkemzar kerdibî û seba  Tirkîya babeta ambargoyê çekan berdibi rojdemê Yewîya Ewropa.

Lînde îdîa kerdibi ke Swêdî di serranê peyênan de çekî nêrotî Tirkîya, têna malzemeyê hetkarîya lezgînî û betanîyeyê şewatî rotî. Labelê Kovara Kvartalî netîceyê cigêrayîşêkê hîra de eşkera kerd ke dezgehanê dewlete ra LKABî cewherê asinî û şîrketa SSAByî  ya ke dewlete hemkara ci ya, berhemê asinî rotî Tirkîya. SSABî asinê Swêdî bi nameyê Armoxo ke asino tewr bikalîte yê dinya yo, rotî Tirkîya. Goreyê dokumentanê SSABî asinê  Armoxî yê ke ameyî rotene Tirkîya, şîrketa Otokar Cobra ra ameyî pêşkêşkerdene ke na şîrkete wesayîtê bizirxî yê bi tipê Cobra virazena. Kovare bi dîmenan zî mojna ke wesayîtê bizirxî yê Cobra Sûrîye de vera hêzanê Kurdan ameyî xebitnayene.