Wezîrê verênî yê Îtalya Paolo Ferreroyî derheqê Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' û tecrîdê Îmraliyî de ANFyî rê qisey kerd.

Ferreroyî tecrîdê Îmraliyî sey bêhuqûqîyêke pênase kerd û vat: ''Dewleta tirke wazena bi nê tecrîdî fikranê Ocalanî asteng bikera. Abdullah Ocalan roşnvîr, şorişgêr û fîlozofêko serkêş o. No tecrîdê dewleta tirke maneno kerdişanê îqtîdarê Mussoliniyî yê vera Antonio Gramsciyî. Dewleta tirke wazena fikranê Ocalanî bikişa ke nê fîkrî Marksîzmê nê wextî yê. Abdullah Ocalan çareserîya meseleya kurdan de aktorêko girîng o. Seba çareserîye azadîya Ocalanî do biba gama verêne. Yanî azadîya Ocalanî meseleyêka komelkî ya.''

Ferreroyî bale ante girîngîya paradîgmayanê Abdullah Ocalanî ser û vat: ''Paradîgmaya Ocalanî ya demokratîke, ekolojîke û azadîgira cinîyan serkewtişê vera kapîtalîzmî mojnena. Ocalan Konfederalîzmê Demokratîkî pêşnîyaz keno. No yeno manaya demokrasîyê raştikênî û azadîya cinîyan. Ocalan bi paradîgmaya xo çareserîya meseleyanê bingeyînan pêşnîyaz keno. Goreyê mi fikrê Ocalanî Marksîzmê nikayênî yê.''