Şaristananê Bremen û Kasselî yê Almanya, şaristanê Grazî yê Awusturya û paytextê Îtalya Roma de kurdîstanijî teba dostanê xo vejîyay meydanan û qirkerî û galê îşxalkerî yê Tirkîya şermezar kerdî. 

Bremen: Bi sloganê “Hîrê çalakîyî, hîrê armancî, hîrê rengî û armancêk” bi beşdarîya sazîyanê dostanê kurdan û kurdîstanijan çalakîyî amey kerdene. Çalakîkerî bi hîrê pertan ver bi merkezê şaristanî rayîr şîy. Meydanê teyareyan ê Bremenî, Walleyî û verê fabrîkaya Rehnmetalî ra rayîrşîyayîşî dest pêkerd. Çalakîkerî qase çar seatan rayîr şîy û merkezê şaristanî de amey pêser. Her hîrê pertî ke restî pê seba nêm seate çalekîya roniştişî ameye kerdene û dima çalakîkerî ver bi Parlementoyê Eyaletî rayîr şîy. Verê Parlementoyê Eyaletî de mîtîngêk ame serûberkerdene û parlementeranê federal ê eyaletî wisey kerd. Qiseykerdoxan dîyar kerd ke ganî îşxalkerîya Dewleta Tirkan û cerganê aye cade bêra qedeneyane. 

Beşdarê Çalakîye

Meclîsê Wendekaran ê Unîversîteya Bremenî (AstA Uni Bremen), Komê Antîfaşîstî, Chilenische Delegasion (Junge Gew), Komê Tamîlan, Ciwanê Xoverdayox ê Bremenî, Komê Ciwanan ê Otonomî, Frauen Strukturen Bremen, Wagenplatz Lolhafen, Cinîyê Xoverdayoxî (Frauen Streik Bremen), Fridays for Future, Achim Meclîs Ezidische, Saîdî Kurdî Mizgeft, Cemevi Bremen, parlamenter, temsilkarê Komîteya Pawitişê Rojawanî yê Bremenî.

Kassel: Galê îşxalî yê vera Vakur û Rojhelatê Sûrîye bi rayîrşîyayîşêk amey şermezarkerdene. Çalakîye de vera Dewleta Tirkan sloganî amey vatene. Dima Kogisplatzî de mîtîngêk ame serûberkerdene. 

Graz: Çalakîkeran bi kombîyayîşêk galê Dewleta Tirkan şermezar kerdî. Reyna seba xoverdayîşê Vakur û Rojhelatê Sûrîye ra wayîrvejîyayîşî veng dayîya. Çalakî de derheqê îşgalî de vilawekî amey vilakerdene û wendene.

Roma: Vera Faşîzmê Dewleta Tirkan ê vera Vakur û Rojhelatê Sûrîye rayîrşîyayîşek ame kerdene. Bi hezeran kesî vera faşîzmî rayîr şîy. Çalakî de xoverdayîşê Rojawanî ame selamkerdene û sloganê “Biciwîyo xoverdayîşê Rojawanî, biciwîyo xoverdayîşê YPG û YPJ” amey vatene.