Seba paştdayîşê Rojawanî Heyva Sore ya Kurdîstanî-Îtalya û dezgehê bi nameyê ARCÎ şaristanê Floransa de çalakîyêke kerde.

Selahîyetdaranê sendîkaya ARCÎ ra Mandreddî Sauroyî çalakîye de qisey kerd û bale ante hêrişanê vera Rojawanî ser. Sauroyî pare kerd ke sîstemo demokratîk ê Rojawanî seba komelê Ewropa rayîrê xelisîyayîşî yo û vat: ''Nêbeno ke ma nê sîstemî lapanê Erdoganê dîktatorî û cergan de verdê. Hukmatê Îtalya ganî peymana leşkerî ya bi dewleta tirke batal bikero.''

Alessandro Orsettîyo ke babîyê şerwanê enternasyonalîstî Lorenzo Orseettî (Têkoşer Piling) o çalakîye de qisey kerd û îfade kerd ke lajê ey seba şarê kurdî têkoşînêko pîl kerd û vat: ''Serra 2019î de lajê mi şehîd bi. Seba xeta têkoşînê pîlî çi destê mi ra bêro ez amade ya ke bikera. Ganî her kes paştî bido nê têkoşînî.''

Hemserekê Heyva Sore ya Kurdîstanî Alîcan Yildizî zî vist vîrî ke Serekkomarê Tirkîya Erdogan waranê sivîlan ê Rojawanî ser o bombayan varnena û vat: ''Wexto ke şarê Rojawanî vera DAÎŞî şer kerdêne Ewropa paştî dayêne ci la Ewropa vera sucanê merdimîye yê Erdoganî vera Rojawanî bêveng o. Ganî her kes paştî bido şarê Rojawanî.''

Çalakîye de fîlmê Enrîco Delgamba yê derheqê Rojawanî de ame mojnayene. Şewe de seba Heyva Sor hetkarîya madîye ameye komkerdene.