Banê Şaredarîya Bajarê Girdî ya Londra de seba Newroze resepîyonêk ame dayene. Şaredarê Bajarê Girdî yê Londra Sadiq Khan, Şaredarê Hackneyî Philip Glanville, Şaredara Kensingtonî Therese Rossîye zî mîyan de zaf parlamenter û temsîlkarê dezgehan tewrê resepsîyonî bîyî.

Resepsîyonê Newroze hetê Merkezê Averşîyayîş ê Kurdan (Centre for Kurdish Progress) û Meclîsê Şarê Kurdî yê Brîtanya ra ame organîzekerdene. Qiseykerdoxan hêrişê dewleta Tirkî yê vera parlamenteranê şarê Kurdî şermezar kerdî.

Şaredarê Bajarê Girdî yê Londra destpêkê qiseykerdişê xo de Newroze bi Kurdkî pîroz kerde û ard ziwan ke, rolê cimatê Kurdî yo ke Londra de yo, hetê kultur û ekonomî ra muhîm o û ê sereberz ê ke Newroze Şaredarîya Bajarê Girdî de pîroz kenê.

Khanî vat, “Ma ewro tîya de roşanê Newroze pîroz kenê. No çira zaf muhîm o; çunke ma Londra de hurmet cîyarengan rê kenê û pîroz kenê. Nowroz a ke destpêka serra newe ya Kurdan a, vera hêzanê ke wazenê dêsan mabênê şaran de do bivirazê de, a roja ke mabênê şaran de pirdî yenê kerdene, dostîye yena awan kerdene û destpêkerdişêko newo yeno kerdene ya.

GLANVILLE: WA HURMET ÎRADEYÊ ŞARAN RÊ BIKERÊ

Şaredarê qezaya Hackneyî ya Londonî Philip Glanville zî vengdayîş bi dewleta Tirkî kerd ke weçînayîşê cayîyan ê 31'ê Adare de humet bimojnê îradeyê şarê Kurdan. Hetê bînî ra vengdayîş bi hukmatê Qralîyetê Yewbîyayeyî kerd ke na babete de çîyêk bikero.

Dimayê qiseykerdişê Merkezê Averşîyayîşî yê Kurdan ra Îbrahîm Dogûşî, bi nameyê Meclîsê Şarê Kurdî yê Brîtanyayî zî Turkan Ozcane qiseykerdişêk kerd. Ozcane bale ante serê parlamentera HDP'yî Leyla Guven a ke grevê vêşanîye de ya û vat, Têgêrayîşê Azadîye yê Kurdan çar parçeyanê Kurdistanî de çarçewaya prensîpanê azadî, têduştî û demokrasî de vera faşîzmî şer keno. Ozcane ard ziwan ke, zext û zordarîya dewleta Tirkî ya vera şarê Kurdan her wareyan de dewam kena û vengdayîş bi her kesî kerd ke vera nê rejîmê faşîzm û otorîterî paştdayîş bidê.

Qiseykerdiş û peyaman ra dima resepsîyonê Newroze bi deyîran û kaykerdişê govendan qedîya.