Bajarê Munîhî yê Almanya de serkêşîya Yewîya Cinîyan ê Kurdan ê Almanya (YJK-E) û Partîya Çepe ya Almanan  (Die Linke) de şaredarî de resepsîyon ame organîzekerdene. Rêxistinê cinîyan, şexsîyetê namdarî û temsîlkarê partîyan tewrê ci bîyî. Resepsîyon de derheqê mana û muhîmîye û kulturê têkoşînî yê Newroze de ame qiseykerdene.

Qiseykerdişê bi nameyê YJK-E de bale ameye atene tarîxê Newroze ser û ame vatene ke têkoşînê cinîyan ewro bi şîarê “jin jiyan azadi” vera dehaqanê zaliman dewam keno.

Qiseykerdişê bi nameyê DEM Partî de zî ame vateneke semedê çareserkerdişê meseleya kurdan ganî Rayberê Şarê Kurdî Abdullah Ocalan bibo azad.

Qiseykerdişê bi nameyê Die Linke de ame vengdayene ke wa qedexeyê serê PKKyî bêro wedaritene û hemleya Abdullah Ocalanî rê azadîye û meseleya kurdan rê çareserîya sîyasîye ameye selamkerdene.

Hemsereka KON MEDî Rukene Akça zî veng da her kesî ke wa 23ê adare tewrê Newroza Frankfutî bibo.

Resepsîyono ke tede sloganê “Jin jîyan Azadî”  ameyî vatene  de  bi goştarîkerdişê muzîkî qedîya.