Xeylêk şaristananê Ewropa de Şehîdê Menga Gulane bi aktîvîteyanê cîya-cîyayan ameyî yadkerdene.

Şaristanê Dresdenî yê Almanya de serkêşîya Meclîsê Cinîyan ê Uta û Merkezê Komelê Demokratîkî yê Kurdan (MKDK) de Şehîdê Menga Gulane ameyî yadkerdene.  Aktîvîte de derheqê şehîdan de sînevîzyonêk ame mojnayene. Aktîvîte pê sloganan qedîyaye.

Şaristanê Grellingenî yê Swîsre de serkêşîya KOMAWî de Şehîdê Menga Gulane ameyî yadkerdene. Hemserekê Kongra-Gelî Remzî Kartalî zî aktîvîte de qisey kerd û îfade kerd ke têkoşînê kurdan bi xoverdayîşê şehîdan beno pîlêr. Aktîvîte pê deyîranê hunermendanê TEV-ÇANDî qedîya.

Şaristanê Strasbourgî yê Fransa de Şehîdê Menga Gulane, Aysele Dogan û gerîlayê ke hêrişanê dewleta tirke yê vera Zapî de şehîd bîyî ameyî yadkerdene. Aktîvîte de derheqê şehîdan de sînevîzyonêk ame mojnayene. Qiseykerdişan de ame vatene ke PKK partîya şehîdan a û her şehîdêk/e rayîrê azadîya kurdan akeno/a.

Şaristanê Fraiburgî yê Almanya de Şehîdê Menga Gulane û gerîlayê HPGyî Bawer Nas (Lezgîn Bawer)o ke 16ê gulane de şehîd bi û Ayhan Înalhan (Mîrza Rênas)o ke 19ê gulane de Metîna de şehîd bi û Aysele Dogan ameyî yadkerdene. Qiseykerdişan de ame vatene ke şarê kurdî do tim rêçê şehîdan de têkoşînê xo rê dewam bikero.  

Şaristanê Mannheimî yê Almanya de zî hetê meclîsê herême ra bi eynî waştişî aktîvîteyêke ameye organîzekerdene. Kombîyayîş de tecrîdê Îmrali, zextê zîndanan û hêrişê îşxalî yê dewleta tirke yê vera Kurdîstanî ameyî ercnayene.

Şaristanê Reimsî yê Fransa de hetê Merkezê Komelê Demokratîkî yê Arîne Mîrkan ra aktîvîteyêke ameye kerdene. Aktîvîte de merdimanê şehîdan qisey kerd û vat ê do wayîrê têkoşînê şehîdan bivejîyê.