Bajaranê Kolnî  û Aurichî yê Almanya û bajarê Bellizona yê Swîsre de semedê yadkerdişê şehîdanê menga hezîrane aktîvîteyî ameyî kerdene.

Bellizona de şexsê  gerîlayê HPGyî Çekdar Cudî (Ekrem Akturk) yo ke 18ê nîsane de Metîna de şehîd kewt şehîdê menga hezîrane ameyî yadkerdene. Aktîvîte de bale ameye antene muhîmîya rolê şehîdan ser û sozê domnayîşê têkoşînî ame dayene.

Aurich de zî cinîyan bi aktîvîteyêke Zeynepe Kinaci (Zîlane) ya ke 30ê hezîrana 19996î de Dêrsim de çalakîya fedayîye kerde arde vîrî. Cinîyan vat Zîlane afernayîşê têkoşînê cinîya azade de gama tewr pîle eşte û vernîya înan roşn kerd.

Koln de aktîveteya ke hetê YJK-E ra ameye organîzekerdene Merkezê Komelê Demokratîkî yê Kurdan de ameye kerdene. Salonê yadkerdişî pê fotografanê şehîdan ame xemilnayene û mektubê şehîdanê fedayîyan ê  Zeynepe Kinaci û Sema Yuce ameyî wendene.

Aktîvîte de bi nameyê Dezgehê Keyeyanê Şehîdan (KOMAW) Şengê Kahraman û atkîvîste Nûda Amed qisey kerd. Qiseykerdişan de ardiya ziwan ke menga gulane ya şehîdan a, hezîrane zî ya fedayîyan  a û ame vatene ke  kurdî reçê şehîdanê xo yê fedayîyan de têkoşînî domnenê. Aktîvîte de Denîze Poyraz zî ameyî yadkerdene û derheqê Leyla Agirî de sînevîzyon ame ramojnayene.