Şehîdê Qirkerdişê Parisî yê 9ê Çeleyê 2013î Sakîne Cansiz, Fîdan Dogan û Leyla Şaylemez cayê qetilkerdişî de, verê Buroyê Enformasyonî yê Kurdîstanî de ameyî yadkerdene.

Kurdîstanijî, dostê înan û tay sîyasetmedarê fransizî tewrê merasîmê yadkerdişî bîyî.

Vervatoxa Karanê Teberî ya CDK-Fyî Bêrîvane Firat merasîm de ard ziwan ke rixmo ke wird Qirkerdişê Parisî zî hetê dewleta tirke ra ameyê kerdene dewleta Fransa hesabê nînan pers nêkerd.

Temsîlkarê Şaredarîya Herêma 10ine ya Parisî Elie Jousseain vat: ''Rixmê her çî zî cigêrayîşê ma yê edaletî dewam keno. Eke dewleta ma 11 serrî verî dosyaya Qirkerdişê 9ê Çeleyî nêqefilnayêne ewro Evîne Goyî, Mîr Perwer û Abdurrahman Kizil do mîyanê ma de bibê. Ma do heta peynî pawitişê kurdan rê dewam bikerê û azadîya Abdullah Ocalanî û Kurdîstanî biwazê.''

Nameyê TJK-E û TJK-Fyî ser o Xanê Akdogan vat: ''Dişmenê kurdî zulmê xo ra dewam kenê la zulmê înan têkoşînê ma hîra keno. Dewleta Fransa bi tewirê xo hemkarîya dewleta tirke rê dewam kena. Kurdî serkêşîya Abdullah Ocalanî de ver bi azadîye şinê.''

Berpirsê Partiya Komunîste ya Fransa Vincent Bouletî vat: ''Têkoşînê înan ê edaletî de ganî ma hetê kurdan de vinderê. Erdogan ewro seba pêro dinya tehluke yo. Ma wazenê ke wa Fransa kurdan bipawa.''

Têgêrayîşê Têkoşînê Vera Nîjadperestî û Dostanîya Şaran (Renê Le Mignot MRAT) no mesaj da:Eke PKK lîsteya terorî ra biameyêne vetene nê qirkerdişî do nêbîyêne. Ma venga hukmatê Fransa danê ke hemkarîya rejîmê faşîstî ra fek vera bida. PKKyî vera DAÎŞî şer kerd û hemwelatîyê ma zî pawitî.''

Nameyê Komeleya Franco-Kurdistanî Sylvie Jan vat: ''Seba ke PKK lîsteya terorî de cagêno kurdî yenê krîmînalîzekerdene. Heta ke kurdî binê bombayan de bê ma û pêro dinya zî binê tehlukeyî de bibê.''