Sere de bajarê Strasbourgî yê Fransa  de ke Konseya Ewropa, CPT û Mehkemeya Heqanê Merdiman a Ewropa tede yê, 74 merkezan de ke serranê Rayberê Şarê Kurdî Abdullah Ocalanî temsîl kenê, eşkerayîyê çapemenîye ameyî organîzekerdene.

Pîya bi welatanê Ewropa Bangladeş, Pakistan, Tokyo, Hindistan, Kenya, Afrîkaya Başûre, Amerîkaya Latîne û bi desan merkezanê bînan de bi hewayêkê hemwextî  eşkerayîyî ameyî dayene.

Çar leteyanê dinya ra akademîsyen, rojnamevan, rêxistinê komelê sîvîlî, partîyê sîyasîyî, parlamenteî, aktîvîstê ke têkoşînê heqî rayra benê, fîlozofî, kesanê ke xelata haştîye ya Nobelî girewte, rêxistinê cinîyan, temsîlkarê şarê cayî zî tede xeylêk kesan hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' daye destpêkerdene.

Eşkerayîya ke 74 merkezan de bi hewayêkê hemwextî ameye dayene wina ya:

“Bi na kampanya yeno waştene ke wa Raybero Kurd Abdullah Ocalan tewrê prosesê dîyalogî yê neweyî bibo ke meseleya kurdan bêro çareserkerdene. Abdullah Ocalan rayberêko sîyasî yo kurd o ke heme dinya de hetê bi mîlyonan kurdan ra sey temsîlkarê înan ê sîyasîyî yeno vînayene. Sibata 1999î de bi operasyonê îstîxbararî yê mîyanneteweyî ame remnayene û şawîya Tirkîya. O wextî ra nata zîndan de yo bi serran temasê ci bi dinya ame birnayene. Raştê îşkence û zextanê giranan ame. Rixmê nê kurdî bi paradîgmaya ey seba ke qederê xo tayîn bikerê, têkoşîn kenê û şaranê bînan rê benê îlham.

Seba ke meseleya kurdan meseleya mîyanneteweyî ya, kampanya zî biney mîyanneteweyî ya. Kurdîstan mabênê  Tirkîya, Iran, Iraq û Sûrîye de ameyo letekerdene. No letekerdiş seserre verî hetê Îngîlîstan, Fransa û hêzanê Ewropa ra ame kerdene. Tirkîya bi paştdayîşê Amerîka û endamanê NATOyî hêrişê kurdan kena. Kampanya mîyanneteweyî ya çunke çareserîyê Abdullah Ocalanî mîyanneteweyî yê. Çareserîyê Abdullah Ocalanî eşkenê problemanê Tirkîya û cîrananê ci çareser bikerê. Eke Abdullah Ocalan bibo azad û û tewrê prosese sîyasîyî bibo, meseleya kurdan yena çareserkerdene. Rayberîya otorîter a Tirkîya nê zana û nê senaryoyî ra zaf tersena. Coka şerranê xo kena derg û hîrrê serrî yo Abdullah Ocalanî binê tecrîdê giranî de tepişena.

Abdullah Ocalanî 2019 de pêvînayîşê xo yê bi avûkatanê xo yê peyênî de vatbi eke firsetêk bidîyo ci, o eşkeno hewteyêk de na mesele çareser bikero. Hetê bînî ra ma nika her wextî ra zafêr semedê weşî û asayîşê Abdullah Ocalanî qesawet kenê. Tecrîd warê mîyanneteweyî de sey îşkenceyî yeno qebûlkerdene. No îşkence hîrê serrî yo dewam keno ke zaf bitehluke yo. Ganî cade Raybero Kurd Abdullah Ocalan avûkat û merdimanê xo reyde pêvînayîş bikero û serbest bêro veradayene ke bieşko rolê xo yê semedê çareserkerdişê meseleya kurdan bîyarî ca.”