Heyetê Îmraliyî yê DEM Partî yo ke Pervîne Buldan, Sirri Sureyya Onder û Ahmet Turkî ra yeno pê, Serekê Pêroyî yê Partîya DEVA  Ali Babacanî reyde pêvînayîş kerd.  Serekwekîlê Pêroyî yê Partîya DEVA Îbrahîm Çanakçi, Hetkarê Serekê Pêroyî Mehmet Emin Ekmen û Sadullah Engin zî tewrê pêvînayîşî bîyî.

Badê pêvînayîşî Babacan û Onderî eşkerayîya kilme daye. Babacanî vat: ''1ê teşrîna verêne ra nata îklîmo newe est o. Ma cedkerdişê çareserîye yê nê prosesî muhîm vînenî. Ma sey Partîya DEVA her gama ke samîmî yena eştene ma peyê ci yê. Nîyet û hedef muhîm ê. Ma wazenê ke wa selahîyetdarê hukmatî samîmî têbigêrê. Ma nêzanê ke Birêz Erdogan sey serekkomarî eşkera ça de vindeno. Meclîs aderso muhîm o la ganî Erdogan cayo ke tede vindeno zelal bikero.''

Onderî zî ard ziwan ke înan pêvînayîş de babetê zaf muhîmî girewtî dest û vat ma hîşyarî û pêşnîyazê cîya cîyayayî girewtî.

Sirri Sureyya Onderî nê vatî: ''Ma qala qewimîyayîşan kerd. Her yew pêşnîyaz zaf muhîm o. Bi nînan ma eşkenê verê mutabakatan abikerê. Ma do dahîna hîra eşkerayîye bidê. Sey vizêrî ma do ewro zî prosesî zaf zelal rayra berê.''

Onderê ke cebap da persanê rojnamegeran îfade kerd ke wextê pêvînayîşê bînî yê Îmraliyî bewlî nîyo û vat Ahmet Turk zî do tewrê pêvînayîşê bînî bibo.

Onderî vat ê do sey Heyetê Îmraliyî yê DEM Partî do partîyanê kurdan reyde pêvînayîş bikerî.

Heyetî di rama ra Serekê Pêroyî yê  Partîya Yeniden Refah Fatih Erbakanî reyde zî pêvînayîş kerd.

Badê pêvînayîşê ke meclîs de ame kerdene Onder û Erbakanî eşkerayîye daye. Erbakanî ard ziwan ke heyetî tay persê înan cewab kerdî û vat: '' Înşallah beno wesîleya xeyrî.''

Onderî zî ard ziwan ke înan cewabê persan dayî û pêşnîyazî girewtî û vat: ''Ma ameyî peynîya nê maratonî.''