Hemsereka Komelê Demokratîkî yê Kurdan ê Fransa (CDK-F) Xane Akdogan derheqê Qirkerdişê Parisî yê 2023yî de ANFyî rê qisey kerd.

Akdogane pare kerd ke no qirkerdiş dewamê Qirkerdişê Parisî yê 9ê Çeleyê 2013î bi û fermanê nê qirkerdişî zî hetê dewleta tirke ra ameyo dayene. Akdogane vat: ''No qirkerdiş plankerde bi. Zanîyayêne ke 23yê kanûne de bi beşdarîya 80 delegeyan kombîyayîşêk do biameyêne kerdene. Dej û hêrsê ma pîl o. Dişmen her ca de hêrişê kurdan keno. Dewleta îşxalkere seba ke Zap, Metîna û Avaşîn de teng bîye hêrişê Rojawa û kurdanê Ewropa kena. Embaze Evîne Goyî embazêka serkêşe bîye. Seke Rayberîye vatêne partîya ma partîya şehîdan a. Her ke ma de şehadetî qewimîyenê ma benê pîlêr.''

Akdogane pare kerd ke CDK-Fyî îtîraz kerdo ke tetîkkêş bî sûcdarîya nîjadperestîye tepişîyayo û vat: ''Ma dewleta Fransa ra pers kerd ke çira ê her kesî pawenê la kurdan nêpawenê. Kurdî 40-50 serrî yo Fransa de yê û qetî kerrayêke zî nêeşte. No hêriş hêrişêko nîjadperest nîyo teyna. Ma vera na bire zî dewa akerde.''

Akdogane îfade kerd ke otopsîyê hîrê şehîdan dewam kenê û vat: ''Ma pêvînayîşê bi selahîyetdaranê Fransa de vat ke ma wazenê hînî cenazayanê xo bigêrê. Keyeyê şehîdanê ma cenazayanê xo b dejî pawenê. Key ma cenazayanê xo bigêrê bi merasîmanê pîlan bişawê ver bi welatî. Şehîdê ma erjê ma yê, şarê ma asta tewr berzî do wayîrê erj û şehîdanê xo vejîyo.''