AKP ferman dano, qeyûm ano ca!

Wan de rêxistina AKPyî ya Wanî ferman dana qeyûmê Şaredarîya Wanî û qeyûm zî karkeran karî ra vejeno.

Qeyûmê Şaredarîye Pîle ya Wanî verê cû tay karkerî karî ra vetbi. 250 karkeran muracatê mehkeme kerd û mehkeme heq dabi înan. Yeno parekerdene ke nê karkerê ke  pawenê ke abigêrê karê xo do reyna nêrê girewtene û herinda nînan de kesanê ke lîsteya rêxistina AKPyî ya Wanî de ye do bixebitê.

Dima ke serra 2016î deŞaredarê Wanî Bekîr Kaya amebi tepiştene qeyûm amebi tayînkerdene. 

Wextê qeyûm Murat Zorogluyî de sekreterê pêroyî yê Wanî Mustafa Yalçinî vîdeoyêk de vatbi ke:''Ganî merdim nê pêroyînan werte ra wedarê. 653 karkerî bi îmzaya mi karî ra ameyî vetene. Wexto ke mi no kar kerd zaf kêfê mi ame.''

250 karkerê ke hetê qeyûm Murat Zorogluyî ra karî ra ameybî vetene seba ke abigêrê karê xo muracatê mehkeme kerd. Karkerî weçînayîşê 31ê adare ra verî mehkeme de ser kewtî. Karkeran pawitêne ke abigêrê karê xo la îmtîhanê înan sey nêserkewte ameyî hesibnayene. Eşkera bi ke rêxistina AKPyî ya Wanî qeyûmî rê teda kerde. Rêxistina AKPyî lîsteyêke daye qeyûm û ci ra waşt ke înan bigêro kar. Ame zanayene ke hewteyê vîyarteyî de zî 6 karkerî karî ra ameyî vetene û bi nê hawayî herinda înan ameye îşxalkerdene.