Vizêr reyna xeylî bajaran ê Ewropa de cinîyî bi wesîleya 8’ê Adere aktîvîteyan de ameyî têhet û mesajê xurtkerdişê mucadeleyî dayî.

DUSSELDORF

Bajarê Dusseldorfî yê Almanya de rayberîya Têgêrayîşê Cînîyan ê Kurdan ê Ewropa (TJK-E) de bi şîarê ‘Xoverdayîşê cînîyan keno azad‘ rayraşîyayîşêk ame viraştene. Bi seyan cinîyî tewrê ci bîyî û şexsê Leyla Guvene de xoverdayîşê grevê vêşanîye silam kerd. Cinîyan bado zî vernîya şaredarîya bajarî de eşkerayîyêk daye. Eşkerayîye de bale ancîyaye tecrîdê serê Ocalanî ser û hukmatê Almanya ra ame waştene ke bêvêng memano.

BREMEN

Bajarê Bremenî de zî bi heman waştişî cinîyî kuçeyan de bî. Çalakîya ke hetê Meclîsê Cinîyan ê Kurdan ê Sêvê ra ameye organîzekerdene xeylî organîzasyonanê cinîyan ê bînan zî paştî daye ci. Çalakîye de mesajê KJK’yî ame wendene.

SENDEN

Bajarê Sendenî yê Almanya de zî cinîyan bi aktîvîtêyek roja xo pîroz kerde. Xeylî cinîyî ameyî têhet û bale ante xoverdayîşê cinîyan ser. Qiseykerdişan de muhîmîya mucadeleyê cinîyan ser o ame vindertene. Çalakî bi deyîran û govende qedîyaye.

MALBOÛRNE

Bajarê Melboûrne yê Awûstûralya de zî hetê Yewîya Cinîyan ê Kurdan ê Demokratîkî ra aktîvîtêyêk ameye organîzekerdene. Aktîvîte de tecrîdê serê Ocalanî ame şermezarkerdene û bale ancîyaye xoverdayîşo ke rayberîya Leyla Guvene de yeno domnayene ser.