Wekîla Partîya Çepe Sevîme Dagdelen çend rojî verî derheqê xebatanê îstîxbaratî yê Tirkîya de vernîyazêkê persan dabi Meclîsê Federalî. Musteşarê Wezîrê Edaletî Benjamin Strasserî cewab da persname.

Musteşar Strasserî doneyê 2022yî eşkera kerdî ke Serdozgerîya Komare ya Federale derheqê 16 kesan de bi sebebo ke rêxistinanê îstîxbaratî yê ecnebîyan rê ajanîye kenê, tehqîqat akerdo û 2ê înan zî Tirkîya de têkilîye kerdêne. Cewab de ame vatene ke 3yê nîsana 2023yî de derheqê kesêkê/a bînî/e de zî bi sûcdarîya ajanîya MÎTî tehqîqat ameyo akerdene.

Musteşar Strassesî doneyê 2022yî û hîrê mengan ê 2023yî eşkera kerdî û dîyar kerd ke rejîmê Erdoganî 81 kesî 2022 de û 33 kesî zî emser înan rê waşto..

Goreyê cewabî dewleta tirke tehqîqatanê 2022yî de Almanya ra hemkarîye waşta û 53 kesî zî seba muhakemekerdişî waştê. 

Almanya de MÎT bi hawayêkê xurtî xo sersefîrîye, camî, banka ûsn. de rêxistin keno. Dewleta Almanya her serre tehqîqatanê winayênan ajananê MÎTî ser o akena la nê tehqîqatan bênetîce verdena.

Ajanê MÎTî Mehmet Fatîh Sayano ke sîyasetmedaranê kurdan ser o agahîyî dayêne MÎTî, ci rê sey xelate cezayêke dîyabî. Mehkemeya Hamburgî teşrîna verêne ya 2017î de Sayan bi bahaneya 'profesyonel nîyo', bi şertê kontrolê edlîyî vera dabi.