Îqtîdarê AKP-MHPyî yo ke wextê peyênî de Almanya de camî û komeleyan de karê weçînayîşî keno, peynîya peynî de hetê îqtîdarê Almanya ra ame hişyarkerdene. Wezîrîya Karanê Zereyî yê Almanya vera kombîyayîş û qiseyanê Wekîlê AKPyî yê Nevşehîrî Mustafa Açikgozo ke Neussî de camîyêke de qisey kerdbi, nêrazîbîyayîşê xo mojna.

Eşkerayîya ke serê hesabê medyaya dîjîale yê wezîrîye de weşanîyaya, tede ame parekerdene ke wezîrîye venga Sersefîrîya Tirkîya daya û seba ke serebûtêko newe sey Neussî dibare nêbo Anqara hişyar kerda. Eşkerayîye de ame vatene ke sersefîrîye ameya hişyarkerdene ke sîyasetmedarê tirkî teyna bi destûrê Wezîrîya Karanê Teberî eşkenê Almanya de karê weçînayîşî bikerê û ame îfadekerdene ke na rewşe bi hawayêkê zelalî amebî eşkerakerdene.

Eşkerayîya wezîrîye de îqtîdarê AKP-MHPyî bi nê qiseyan ame hişyarkerdene: ''Dîmenê sey ê wekîlêkê tirkî ganî dibare nêbê. Almanya de qiseyanê nefretî û propaganda rê ca çin o. Ma bi hawayêkê zelalî pare kerdbi ke çalakîyê seba kampanyaya weçînayîşî ya teberê welatî ganî hêverî hetê ma ra bêra qebulkerdene. Eke temsîlkarê tirkî goreyê krîteranê ma tênêgêrê ganî ma netîceyanê ney biercnê.''

Se bibi?

Wekîlê AKPyî yê Nevşehîrî Mustafa Açikgozî 13ê çeleyê 2023yî de camîyêka şaristanê Neussî de bi qiseyanê nefretî hêrişê kurdan û muxalîfanê rejîmê Erdoganî kerdbi. Dîmenanê qiseykerdişî de Açikgozî bi qiseyê 'Ma do meverdê ke ê Almanya de biciwîyê' kurdan û muxalîfan rê gef wendbi.

Îdareyê Berlinî 2017 de wextê referandumî de seba ke verê kampanyaya weçînayîşî ya rejîmê Erdoganî bigêra bi nameyê 'Partîyê xerîbî nêeşkenê welatê ma dde karê weçînayîşî bikerê' qanûnêkp taybet viraştbi. Almanya ra dima welatanê bînan ê Ewropa zî qanûnê winayênî vetbi.