Paytext Berlin û bajaranê Dusseldorf, Koln û Freiburgî yê Almanya de kurdan û dostanê înan hêrişê îşxalî yê dewleta tirke û îxanetê PDKyî pê çalakîyan şermezar kerd.

Berlin de bi vengdayîşê Meclîsê Cinîyan ê Dest-Danî kurdîstanijî û dostê înan Brandenburger Torî de ameyî têhet. Çalakîye de Nure Alkiş bi nameyê Rêxsitina Serbanî ya Meclîsê Cinîyan ê Êzidîyan qisey kerd. Alkişe PDK sey partîya îxanetî name kerd  û wina venga ci da: " Kurdî bi serran o raştê îxanetê şima yenê. Şima îxanetî ra mird nêbîyî? Hêrişê dişmenî zorê ma nêşinê. Çunke o dişmen o. Ma do tim vera dişmenî têkoşîn bikerê la îxanetê şima ma dejneno. "

Koln de zî Merkezê Komelê Demokratîkî yê Kurdan û AGÎFî pîya çalakîyêke organîze kerde. Çalakîye de pê pankartan hêrişê îşxalî yê dewleta tirke ameyî teşhîrkerdene û seba ke PKK lîsteya terorî bêro vetene îmzayî ameyî arêdayene.

Dusseldorf de zî bi tewrbîyayîşê kurdistanijanê Duisburgî mîtîng ame kerdene. Şaro ke merkezê trenan de ame têhet xoverdayîşê gerîlayan selam kerd û vera hêrişê îşxalî û îxanetî hêrsê xo ard ziwan. Çalakwanan semede tewrbîyayîşê çalakîya 10ê êlule ya Dusseldorfî zî veng da.

Freiburg de zî bi eynî waştişî kurdî û dostê înan meydanan de bî. Çalakîye de veng dîya kurdan ke wa wayîrê xoverdayîşê gerîlayan  vejîyê û hêzanê mîyannetewyîyî ra ame waştene ke wa şirê Tirkîya ser ke verê nê şerî bêro girewtene.