Wekîla Partîya Çepî Gokaye Akbulut çend rojî verî derheqê madeya 47. ya Qanûnê Koçberîye de vernîyazêkê persan pêşkêşê Meclîsê Federalî kerd. Nameyê Hukmatê Federalî ser o Wezîrîya Karanê Zereyî cewab da vernîyazî.

Wezîrîya dîyar kerd ke 13 koçberan rê qedexeyê sîyasetî dîyayo. Nînan ra 4 kesî Baden- Wurttemberg, 2 kesî NRW, kesêk/e Bayern û kesêk/zî Sachsen de ciwîyenê.

Eşkera bi ke nê 13 kesan ra 6 kesî zî kurd ê. Wezîrîye da zanayene ke seba ke 'eleqeyê nê 6 kesan pê PKKyî est o' û Almanya de qedexeyê PKKyî est o înan rê sîyasetkerdiş ame qedexekerdene.

No qanûn seba ke bi hawayêkê hîrayî vera sîyasetmedarê kurdî Muzaffer Ayatayî amebi caardene sey 'Qanûnê Ayatayî' derbazê tarîxê sîyasî yê Almanya bibi. Ayata 20 serran zîndananê Tirkîya de mendbi dima sey multecî şibi Almanya û Almanya de zî cezaya zîndanî ya 3 serran û 6 mengan dîyabi ci. Ayata dima ke vera dîya raştê xeylêk astengîyan ame.

2012 de Buroyê Xerîban ê Stuttgartî esasê madeya 47. ya Qanûnê Koçberîye ser o bire daye ke Ayata wa meqaleyan nênuso, konferansan de qisey mekero û beşdarê çalakîyan nêbo. La dima Mehkemeya Îdarî ya Stuttgartî muracatê Dayîreyê Koçî kerd û bira vindarnayîşê înfazî daye. Mehkeme îfade kerd ke qedexeyê vera Ayatayî 'şikanê cidîyan ê qanûnîyan' virazeno.

Almanya rixmo ke Mehkemeya Heqanê Merdiman a Ewropa (MHME) 2015 de madeya 47. sey dûştê vera azadîya fikran dîbi qanûnî ana ca.