Êlula 2021î de Dusseldorf de sereştişê otêlêke de sîxurê MÎTî Alî Demîr tepişîya. Eşkera bi ke Elî Demîr serra 2018î ra nata Almanya de derheqê muxalîfanê rejîmê AKP-MHPyî de agahîyî kom kerdêne. Odaya Demîrî de çekêk û xeylêk fîşekî est bîyî ke xebatkarêkê otêle key pê hesîyabi gerreyê ey kerd. Yewinanê asayîşî telefonê Demîrî ser o cigêrayîş kerd û tesbît kerd ke eleqeyê ey bi MÎTî est o.

Demîrî 17ê adara 2022yî de Mehkemeya Herême ya Berze ya Dusseldorfî de îtîraf kerd ke o MÎTî rê xebitîyeno û Almanya de sîyasetmedaranê kurdan û kesanê nêzdîyê Cematê Gulenî teqîb keno, nê karan zî seba ke 'neteweperwerêko tirk o' keno.

Muhakemekerdiş hezîrane de qedîya û Alî Demîrî 'qanûnê poşmanîye' ra îstîfade kerd û serrêke û 9 mengî cezaya zîndanî werde. Ey derheqê hemkarê xo Azîz D.yî de zî agahîyê girîngî dayî.

Serdozgerîya Federale ya Karlsruhe destpêkê menga tebaxe de derheqê Azîz D.yî de hemwelatîyê Almanya yo, dest pê tehqîqatî kerd. Selahîyetdaran persê ANFyî yê serê tehqîqatî bêcewab verdayî. La yeno vatene ke Azîz D. hemkaro tewr girîng ê Alî Demîrî yo.

Goreyê tehqîqatê dozgerîye keso ke çek û fîşekî Alî Demîrî rê peyda kerdê Azîz D. yo. Ame parekerdene ke wird endamê MÎTî Azîz D. û Alî Demîr şîyê polîgananê ceribnayîşê çeke û çeke eşte.Rixmê hende delîlan zî Azîz D. nêtepişîya û bi hawayêkê netepişteyî yeno muhakemekerdene.

Almanya de torra ajanîye ya dewleta tirke zaf xurt a. Almanya de MÎTî bi rayîrê dezgehê dîyanetî yê dewleta tirke DÎTÎBî, bi rayîrê camîyanê ci, konsolosxaneyan, banka û buroyanê turîzmî xo rêxistin kerdo.

Derheqê ajananê MÎTî de 2020 de 4 reyî, 2021 de 7 reyî û 2022 de zî derheqê kesêkî de tehqîqatî dîyayî destpêkerdene. Wina texmîn beno ke emser keso ke vera ci tehqîqat abîyo Azîz D. yo.

Tehqîqatê ajanîye de 2017 de vera 19 îmamanê DÎTÎBî tehqîqat ame akerdene. La dewayanê derheqê MÎTî de heta nika têna ceza dîyaye Alî Demîrî.