7ê çeleyê 2023yî de paytextê Fransa Paris de Qirkerdişê Parisî yê 9ê Çeleyê 2013î û 23yê Kanûna 2022yî bi çalakîyanê pîlan ameybî protestokerdene. A roje xeylêk welatanê bînan ra kurdî û dostê înan Paris de ameybî yewca.

Heman roje Almanya de otobusê ke şîyêne Parisî ameybî vindarnayene û bi bahaneya 'qedexeyê tebervejîyayîşê welatî' xeylêk merdimî ameybî astengkerdene.

Wekîla Partîya Çepî Gokaye Akbulut babete berde rojdemê Meclîsê Federalî û hukmatê Federalî ra pers kerd ke çend kesî 7ê çeleyî de ameyê astengkerdene.

Wezîrîye cewabê xo de da zanayene ke 24 hemwelatîyê înan hetê polîsanê federalan ra ameyê astengkerdene. La wezîrîye derheqê tedeyîya astengîye de sebebêk eşkera nêkerd. 

Akbulute waşt ke wa hukmat sebebê astengkerdişî eşkera bikero û vat: ''Gêrayîş û seyahet heqê bingeyî yê. La hetê polîsan ra ameyê astengkerdene. Na bira polîsan yena a mana ke polîsê ma û Hukmato Federal verê Tirkîya de çok şîyê erdî ro.''