Hemserekê KON-MEDî Tahîr Koçer pê îdîaya ke Serekkomarê Tirkîya Erdoganî rê heqaret kerd cara 6. a ke mehkemeya almanan de îfade dano. Mehkeme 10 deqayan dewam kerd. Koçerî mehkeme de vat ey roniştişê Mehkemeya Îdarî ya Hannoverî de îfade nêdayo û mehkeme şermezar kerde. Koçerî ard ziwan ke heta nika 7 dewayî ameyî akerdene û vat: ''Dewayê winasênî dewayanê ke Erdoganî vera ma akerdî, meşrû kenê. Coka mi nêwaşt ke îfade bida.''

Koçer heyetê mehkeme rê vat: ''Ez Almanya de fikranê xo çarçewa azadîye de ke qanûnê Almanya da mi, vana. Eke ez çîyêkê şaşî vaja mi hukm bikerê. Çira şima seba Erdogan mi hukm kenê? Gelo tîya mehkemeya Erdoganî ya?''

Heyetî zî vat: ''Goreyê prosedurî ma do îfadeyê to bigêrê û bierşawê Tirkîya.''

Koçerî vat no hukmkerdiş seba Almanya şerm o û da zanayene ke Erdogan seba ke xo bipawo dewayanê sinasênan akeno, Almanya zî xizmetê ci keno.

Koçerî vat: ''Yeno vatene ke Almanya de 8 hezar ajanê Erdoganî estê. MÎT Almanya de bi rehetî têgêrena. Almanya ganî bi hawayêkê cîdîyî na mesele ser o vindera. Dewayê ke ma rê abenê huqûqî nîyê. Ganî cade na rewşe werte ra bêra wedaritene.''