6’ê Nîsan a 2006’î de, Kassel de hetê hucreya Nazî ra kiştişê Halît Yozgatî yê esnafo koçber ê Tirkîyayijî kiştişo ewilên ê Organîzasyonê Binerdî yê Nasyonal Sosyalîstî (NSU) bi. Rêza kiştişan ê NSU heta 2010 dewam kerde. Pêro pîya 9 esnafê Tirk, Kurd û Yewnanîyî hetê hucreya Nazî ra ameyî kiştene, grûbe ancax menga Teşrîna Peyêne ya serra 2011’î de deşîfre bîye.

Îstîxbaratkar Temm yo ke rastê tu cipersayîşî nêame, serran ra dima roja 2’ê Hezîrane bi kiştişê walîyê Herêma Kasselî Walter Lubcke newe ra ame rojdem. Dimayê skandalê NSU ra ke Almanya pê lerzaye, vejîya werte ke Temmeyo ke dimayê sazîya îstîxbaratê zereyî yê welatî de gureyê xo yê Teşkîlatê Pawitişê Qanûnî ra ame eştene û Kassel de sey memûr karê xo rê dewam kerd very buroyê Lubckeyî de wezîfedar bîyo. Avûkatê Halît Yozgatî Stephan Lucaso ke rojnameyê Bildî rê qisey kerd vat ganî heme razê derheqê Temmeyî rayapêroyîye rê bêrê eşkerakerdene.

Îdarekarê Cayîyî Hedefê Neonazîyan de yê

Serra 2015 de gama ke multecîyî şîyî Almanya Lubckeyî seba ke polîtîkaya sereke Merkele ya akerdişê beran rê paştî dabî hetê Neonazîyan ra amebi tehdîtkerdene. Bi heman hawayî yeno zanayene ke xeylî serekê cayî û pêroyî yê şaredarîyan zî ameyî tehdîtkerdene.

Goreyê hayîdarîyanê ke çapemenîya Almanan ra ameya girewtene tena Eyaletê Mecklenburg Vorpommernî de nameyê 29 sîyasetmedaran lîsteyêka mergî de ameyê dîyene. Goreyê yewîyanê asayîşî yê Almanan nika 12 hezar û 700 rastgêrê hedravîyarteyî welat de ciwîyenê.