Dayîreyê Koç û Multecîyan seba multecîyê kurdî Îdrîs Esenî birêka skandale daye. Dayîreyî waşt ke Îseno ke yewinanê asayîşî tira vatbi 'Înterpol gêreno to, Almanya ra mevejîye' teslîmê Tirkîya bikera.
Îdrîs Esern serranê zanîngehî de semedê têkoşînê demokratîkî ra ci rê cezaya zîndanî ya 6,5 serran amebî dayene. Esen serra 2011î de şi Başûrê Kurdîstanî û tedaya PDKyî ra serra 2018î de sey multecî şi Almanya.
Dayîreyê Koç û Multecîyan (BAMF) waştişê multecîtîye yê Esenî red kerd. Raporê BAMFî de yeno vatene ke Tirkîya dewleta huqûqî ya û wesfê rejîmê Erdoganî yeno dayene. BAMFî seba Esenî vat: ''Seba ke endamîya rêxistine ra cezaya ci esta heqê ci çin o ke Almanya de bimano.''
Dayîreyî îdîa kerd ke Tirkîya de hukmkerdişo adîl esto û îşkenceyo sîstemat zî çin o. Raporê BAMFî de yeno vatene ke Interpolî derheqê Esenî de bira tepiştişî daye û gêreno ci.
Esenî vera bira BAMFî nêrazîbîyayîşê xo mojna û vat: ''Menga kanûne de yewinanê asayîşî mi rê vat ke Interpol gêreno mi û eke ez vejîya teberê Almanya mi tepişeno. Nika zî bi bahaneya Interpoliî wazenê ke mi teslîmê Tirkîya bikerê.''
