Armenîyanê Dîaspora şaristanê Strasbourgî yê Fransa de vera hêrişanê Tirkîya û Azerbaycanî  çalakîyêka rayaşîyayîşî kerde. Armenîyan ardişê cerganê Sûrîye yê Karabagî zî şermezar kerd.

Bi hezaran armenîyî verê Konseya Ewropa de kom bîyî û înan sloganê sey 'Terorîst Alîyev û Erdogan' vatî. 

Armenîyî vizêr serê sibayî verê Konseya Ewropa de kom bîyî û ver bi Mehkemeya Heqanê Merdiman a Ewropa (MHME) rayîrî ra şîyî.

Çalakîkeran verê MHME de îfade kerd ke Azerbaycan û Tirkîya vera merdimîye sûcan kenê û venga MHME û welatanê Ewropa da ke vera nê sûcan tewirê xo bimojnê.

Girseyî wexto ke resa verê Konseya Ewropa çalakîkeranê TJK-E reyde sloganê 'Kiştox Erdogan' vat û faşîzmê dewleta tirke şermezar kerd.

Îdarekarê Komeleya Armenîyan Vigelî tîya de qisey kerd û vat: ''Tirkîya kurdan ra dima nika zî pê cîhadîstan armenan kişena. Ma bêvengîya Ewropa û dinya ya vera naye şermezar kenê.''