Paytextê Yunanistanî Atina de bi tewrbîyayîşê Merkezê Kulturê Demokratîkî yê Kurdan û grûbanê paştîdayîşî yê çepgîr, anarşîst, ekolojî, spor û herêmî ra semedê azadîya fîzîkye ya Rayberê Şarê Kurdî Abdullah Ocalanî rayraşîyayîş ame kerdene. Rayraşîyayîşo ke Meydanê Akademia de dîya destpêkerdene heta verê Konsolosxaneyê Tirkîya dewam kerd û tîya çalakîya roniştişî ameye kerdene û eşkerayîye ameye dayene.

Serhat Çîyayî ke bi nameyê komele qisey kerd, nê vatî: “Înanê ke vera Rayber Apoyî komployê mîyanneteweyîyî hazir kerd û qirkerdişê Îmraliyî danê rayraberdene, bi metodanê bînan komployî danê domanyene. Vera Çapemenîya Azade operasyon ame kerdene ke tecrîdî de dinya rê dana eşnawitene. Nêwzanê wa heqîqet bireso komelî.”

Bi nameyê Înîsîyatîfê Abdullah Ocalanî rê Azadîye Beja P. zî nê vatî: “ Hemleya Azadîye xeylêk cayanê dinya ra têgêrayîşê komelkî, partîyê sîyasî, sendîka, aktîvîst, roşnvîr û bi mîlyonan dostê kurdan dormeyê hedefêkê hemparî de  ardî yewca. Fîkrê Birêz Ocalanî her cayê dinya de hêvî danê şaranê bindestan. Seba ke Abdullah Ocalan bieşko rolê xo yê semedê haştîye bîyaro ca ganî serbest bêro veradayene.”

Eşkerayîya bi nameyê Înîsîyatîfê RiseUp4Rojava de zî azadîya Abdullah Ocalanî ameye waştene û semedê şarê kurdî, Şorişê Rojawanî û Gerîlayanê Azadîye yê Kurdîstanî mesajê paştdayîşî ameyî dayene.