Polîsanê dewleta Belçîka şewa 23yê nîsane de waştişê dewleta Fransa ser o eştbi sudyoyanê Stêrk û Medya Haber TVyî ser. Hetkarê Serekê Pêroyî yê Avûkatanê Sînornenasan û endamê Baroyê Parisî Etienne Lesage derheqê babete de ANFyî rê qisey kerd.

Avûkat Lesageyî îfade kerd ke hêrişê polîsan sîyasî bîyo û vat: ''Ez tedeyî û detayanê dosya nêzanena la Belçîka de reya verêne wina nêerzîyayo bînaya dezgehanê medya. 2010 de zî bê tehqîqat polîsan dest nabi ekîpmananê medyaya kurdan ser. Ma eşkenê vajê ke no hêriş hêrişêko sîyasî yo. Nê hêrişî waştişê dewleta Fransa ser o ameyê kerdene. Mabênê Belçîka û Fransa de peymanî est ê. Ganî medyaya kurdan seba îtîrazî gaman bierza.''

Lesageyî bale ante tewirê polîsanê Belçîka ser û vat: ''Tewirê polîsanê Belçîka huqûqî nêbîyî. La ganî hêverî seba betalkerdişê tehqîqatê vera medyaya kurdan muracatê dezgehanê Belçîka bêro kerdene. Hêrişê polîsanê ê vera medyaya kurdan hetê huqûqî û demokrasîyî ra xelet o ke berê nê dezgehanê medya her kesî rê akerde yo. Hêrişê winayênî zerar danê demokrasî û huqûqî.''

Lesageyî pare kerd ke nêzdîbîyayîşê dewleta Fransa yê vera kurdan qesawet virazeno û vat: ''Tewirê dewleta Fransa û welatê Ewropa yê bînî yê vera kurdan raşt nîyê.''