Avûkatê belçîkayijî Selma Benkhelifa, Joke Callewaert û Georges-Henri Beauthier yê ke Şingal û Mexmûr de hêrişê droneyanê dewleta tirke herind de dîyî û kesê ke raştê hêrîşî ameyî ra wekalet girewt, agêrayî Ewropa û metnêkê çapemenîye vila kerd.

Eşkerayîya avûkatanê belçîkayijan wina ya:

“Iraq de teror: Iraq de êzidîyî û kurdî bi hêrişanê droneyanê tirkan ameyî terorîzekerdene û kiştene. Peynîya temmuza 2022yî de bajarê Zaxoyî yê Vakurê Iraqî de droneyanê tirkan 9 sîvîlî qetil kerdî. Semedê înan Neteweyanê Yewbîyeyan de gerre ame kerdene. Nê hêrişê dewleta tirke yê vera herra Iraqî bêmabên dewam kenê. Herêma kurdan de bi desan sîvîlî ameyî qetilkerdene. Ma sey heyetî şîyî nê qurbanî û keyeyê înan goştarî kerdî. Ma tam agêrayî 29ê tebaxe de vera Kampa Mexmûrî yewna hêriş ame kerdene.

Ma verî Şingal de êzidîyî ziyaret kerdî ke hetê DAÎŞî ra zulm dî û bi qirkerdişî ameyî tehdîtkerdene. Gama ke ma şîyî dewa Xanesorî ya Şingalî ma ser o wesayîtê hewayî yê bêmerdimî gêrayênî. Dewijî vera nê kiştoxanê ke azmînî ra yenê tersê xo ane ziwan. Droneyê tirkan tim serê dewanê înan ra fir danê. Ma di dayîkî nas kenê ke domanê înan nê hêrişan de ameyî qetilkerdene û domanêkî vînenî ke nê hêrişan de birîndar bîyo.

Êzidîyê ke tim raştê qirkerdişan yenê tewr peynî de raştê hêrişê DAÎŞî ameyî. Kênayê ciwanê ke ameyî remanyene û rotene vîrê ma de yê. Rejîmê Erdoganî vera êzidîyan na polîtîkaya domeno.  Şarî şer kerd kiştoxê dewleta îslamî peyser qeldayî. Nika zî yewna tehdîtî rê rî bi rî yê. Qiseykerdişê bi merdimanê qurbanan zaf zerrîya ma dejna û hêrsê ma zafêr kerd. Ganî vera nê çîyêk bêro kerdene.

Ma dima ra şîyî Kampa Memxûrî ke tîya tim hêrişê droneyanê tirkan yenê kerdene. Ma ra vanê serranê 90yan de bado ke artêşa tirke dewê înan vêşnayî ê mecbûr mendê dewanê xo ra vejîyê na kampe de ameyî pêser. Tîya cuye û banê xo newe ra înşa kerdî. Iraq de reyna hetê dewleta tirke ra zulm vînenê.  Dewleta tirke bi bahaneye şerwanê PKKyî yê înan hedef gêna.  La ma merdimê qurbanan dîyî înan de qisey kerd ke êyê ke ameyî qetilkerdene sîvîl ê.

Seba ke wina cînayetî yenê kerdene û bêcaza yenê verdayene ma şok bîyî û hêrsbîyaye agêrayî. Droneyî sey çeka şerî huqûqê mîyanneteweyîyî binpay kenê. Ganî şuxulnayîşê nê droneyan bêro qedexekerdene.’’