Selma Benkhelifaya ke seba ke tecrîdê vera Rayberê Şarê Kurdî Ocalan bêro wedaritene avûkatanê bînan reyde wazena şora Îmraliyî, tewirê CPTyî rexne kerd û vat: ''Ganî Abdullah Ocalan hînî azad bibo.''
Seba ke Rayberê Şarê Kurdî Abdullah Ocalanî bivînê tay avûkatan muracatê Wezîrîya Edaletî kerdbi. Nê avûkatan ra avûkata belçîkayîje Selma Benkhelifa derheqê babete de ANFyî rê qisey kerd.
Avûkate Selma Benkhelifa da zanayene ke ê armanc kenê ke tecrîdê Îmraliyî bişiknê. Selma Benkhelifa îfade kerd ke bêmana ya ke dewlete Ocalanî sey 'terorîstî' vîneno û vat: ''Ocalan hetê bi mîlyonan kesan ra sey qehreman û lîderî yeno qebulkerdene. Coka ganî dewlete ci rê hûrmet bikera. Hînî o ganî azad bibo. Mîsalê Nelson Mandelayî ganî bibo hêvî. O zî hetê rejîmê Apartheidî ra sey 'terorîst' ameyêne dîyene la dima ke azad bibi bi serek û Xelata Nobele girewte.''
Selma Benkhelifa bêvengîya CPTyî ya vera tecrîdê Îmraliyî rexne kerde û vat: ''CPTyî raporê xo yê verênî de vatbi ke tecrîdkerdişê Ocalanî îşkence yo. Mehkemeya Heqanê Merdiman a Ewropa 2014 de vera Tirkîya tewir girewt û dabi zanayene ke tecrîd dûştê Peymana Heqanê Merdiman a Ewropa yo. Ganî CPT bi hawayêkê xurtêrî vera tecrîdî tewir bigêro û mesuldarîya xo bîyaro ca.''
