22 welatanê Ewropa ra 350 avûkatan seba pêvînayîşê bi Rayberê Şarê Kurdî Abdullah Ocalanî muracatê Wezîrîya Edaletî kerdbi. Avûkatanê Seba Demokrasî û Heqanê Merdiman ê Dinya (European Association of Lawyers for Democracy & World Human Rights-ELDH) bi rayîrê zoomî kombîyayîşê çapemenîye kerd. Kombîyayîş de astengkerdişê pêvînayîşê bi Ocalanî ame vîrvistene û reyna waştişê pêvînayîşî ame îfadekerdene.

Kombîyayîş bi moderatorîya Avûkate Cerene Uysal de ame kerdene.

Hemsereka ELDHyî Barbara Spinelli ard ziwan ke binpaykerdişê heqan ra înan muracat kerdo û vat: ''Ganî cade no binpaykerdiş biqedo. Ganî pêro avûkatî seba ney xîret bikerê û bikewê dewre. Ma bi nê muracatî mesuldarîyê Tirkîya vistî vîrî. Ma waşt ke wa krîterê Mandella bêrê caardene. Çar hetanê dinya ra embazanê ma îmza da binê nê mektubî. Ma wazenê cade avûkatî Ocalanî bivînê.''

Dima Sekreterê Pêroyî yê ELDHyî Thoman Schmidtî mektubo ke erşawîya Wezîrîya Edaletî ya Tirkîya wend.

Avûkatanê Buroyê Huqûqî yê Asrinî ra Razîye Ozturk vat: ''18 mengî yo ma muwekîlê xo ra xeberêke nêgênê. Ma rewşa ey ra qerqilîyenê. 2019 ra nata ma 215 reyî seba pêvînayîşî muracat kerd la cewab nêdîya ma. Ma pê bawer ê ke xebatê vera tecrîdî bizêdîyê.''

Nameyê Avûkatanê Demokratan ê Ewropyîjan (AED) ser o Berenice Boehlo qisey kerd û vat: ''Ma pê tecrîdî qerqilîyenê coka ganî avûkatî cade şorê Îmraliyî. Ma wazenê CPT cade şoro Îmraliyî, uca de cigêrayîşan bikero û eşkerayîyêke bido. Tirkîya de heqê merdiman yenê binpaykerdene. Ganî hînî tecrîdê Îmraliyî biqedo. Coka ganî vengê ma zî hîna berzî ra vejîyo.''

Serekê Baroyê Amedî Nahît Erenî vat: ''Ma Wezîrîya Edaletî rê seba pêvînayîşê bi Ocalanî muracat kerd la cewab nêdîya ma. Ma paştî danê na kampanya û çi bikewo milê ma, ma seba na kampanya do bikerê.''

Fabio Marcelliyî vat: ''Rewşa Ocalanî rewşa Tirkîya bi zelalî mojnena. Astengkerdişê pêvînayîşan îşkence yo. Ocalanî binê nê tecrîdê giranî de zî konfederalîzmo demokratîk sey fiikrêkî awan kerd. Veradîyayîşê ey seba pêro dinya girîng o.''

Serekê Komelê Avûkatanê Sosyalîstan ê Haldeneyî Declan Owensî vat: ''Wa Ocalan bêro veradayene û sey Rojawanî fikrê ey wa pêro dinya rê îlham bibê.''

Sekreterê Komeleya Huqûqnasanê Modernan (ÇHD) Umît Buyukdag û Hemserekê OHDyî Bunyamîn Şekerî zî qiseykerdişê xo de waşt ke wa tecrîd bêro qedînayene û CPT şoro Îmraliyî.