Menga hezîrane de paytextê Avusturya Viyana de nîjadperestanê tirkan hêrişê kurdan kerdbi. Yewinanê Asayîşî yê Avsuturya hêrişan de reçê MÎTî dibi.

Polîsanê ke no serebût cigêrayêne, teberê Viyana de ajanêkê MÎTî serê sûcî de tepişt. Derheqê serebûtî de Wezîrê Karanê Zereyî Karl Nehammerî eşkerayîyêka fermîye daye. Nehammerî pare kerd ke nê kesî zanayîşî dayêne Anqara.

Nehammerî bale ante ser ke ê do qet rayîr nêdanê dewleta tirke ke ajanîye bikera û vat: ''Nika ra dima xetê dîplomasîyî do bixebitê. Bi sûcê ajanîye tehqîqat do bêro kerdene.''

Wezîrê Avusturya derheqê nasnameyê kesî de zanayîş nêda. Têna ame parekerdene ke verê cû Tirkîya de ame tepiştene û MÎTî erşawit Avusturya. Wezîra Pêkerdişî Susanne Raab zî vera xebatanê ajanîye yê Tirkîya bi xurtî nêrazîbîyayîşê xo mojna. Raabe îfade kerd ke Tirkîya wazena komelê Avusturya parçe bikera.

Wezîrê Karê Zereyî Nehammerî kombîyayîşê çapemenîye de ard ziwan ke înan Wezîrê Karanê Zereyî yê Almanya zî derheqê mesele de hîşyar kerd. Vatişê wezîrî xeylêk bale ante. Yeno texmînkerdene ke no ajan têna Avusturya de nê pêro Ewropa de aktîf bi.

Goreyê medyaya Avusturya zî mabênê nê ajanî û kesanê ke Avusturya ra şîyê Tirkîya û tepişîyayê, têkilîyêke esta. Serra 2018î ra nata 35 kesê ke Avusturya ra şîyê Tirkîya ameyî tepiştene. Zêdebîyayîşê na hûmare girêdayîyê xebetanê MÎTî ra yo.

Hetê bînî ra keso ke sey endamê MÎTî ame tepiştene sûcê xo îtîraf kerd. Ajan wexto ke ame tepiştene telefonê ci de tay mesajî estbî ke MÎTî rê erşaiwtbî. Ajanî îtîraf kerd ke senî tewrê MÎTî bîyo, Ewropa de sere de kurdan vera muxalîfan xebatî kerdê û komeleyanê tirkan ê Avusturya ra zanayîşî arê dayê. 

Dîya zanayene ke ajanî seba ke bêro veradayene muracat kerd. Yeno pawitene ke ajan bazarîya mabênê rejîmê Erdoganî û Avusturya ra dima do bêro veradayene û dosya bêra qefilnayene.