Endamê Konseya Rayberdişî ya KCKyî Zubeyîr Aydarî îfade kerd ke îtîrafê Qirkerdişê Parisî yê Îsmaîl Hakki Pekînî û vengdayîşê ci yê seba qirkerdişanê neweyan cidî yê û ganî Ewropa zî bi cidîyetî nêzdîyê nê vateyan biba.
Serekê verênî yê Dayîreyê Îstîxbaratî yê Fermandarîya Pêroyî Îsmaîl Hakki Pekînî kanalê CNN Turkî de 16ê sibate de bernameyêk de pare kerd ke ganî vera îdarekaranê KCKyî hêriş bêro kerdene. Pekînî nê bernameyî de Qirkerdişê Parisî îtîraf kerd û vat: ''Ewropa de zî îdarekarê înan estê. Ganî ma çîyêk bîyarê înan ser. Yanî verî Paris de amebi kerdene, heya.''
Endamê Konseya Rayberdişî ya KCKyî Zubeyîr Aydarî mesele ANFyî rê ercnaye.
Aydarî vat: ''No kes her çi zaf hol zaneno, hayîya ci pê esta ke dewlete se kena, kamyew bire gêna. Coka vateyê ci girîng ê, cidî yê. Girîng o ke wezîfedarêkê îstîxbaratî Qirkerdişê Parisî îtîraf kerd. Xora verî zî dokument û delîlan de no amebi îsbatkerdene. Şerê cemaat-AKPyî de cemaat qeydê vengî, AKPyî zî dokumentê MÎTî pare kerdbi. Îtîrafê Pekînî polîtîkaya qirkerdişî ya dewleta tirke deşîfre kena. Erdoganî nawnayîşêkê Riha de 2014 de cemaat sûcdar kerdbi la eşkera bi ke Anqara fermanê nê qirkerdişî dayo.''
Aydarî beşo girîng o bîn ê Pekînî wina ercna: ''Pekîn vano ke dewlete wazena verê xo bida beşanê KCKyî yê Ewropa. No îtîrafêk û gef o. No têna îfadeyê Pekînî nê îfadeyê dewlete yo. Coka nê qiseyê ci ma rê cidî yê. Ma do goreyê naye tedbîranê xo bigêrê. Dewleta tirke xeylêk wext o tîya de falîyetanê suîkastî kenê. Almanya, Belçîka û Fransa de beşê înan estê. Ez zî tede ya ê vera ma xîretê suîkastî de yê. Na mesele de Belçîka de dosyayêke esta.''
Hezîrana 2017î de Belçîka de 3 kesê şikdarî pê gerreyê dezgehanê kurdan ameybî vindarnayene. Nê 3 kesan vera Hemserekê KoNGRA-GELî Remzî Kartalî planê suîkastî kerdêne. Înan ra yew leşkero verên, yew polîs û oyo bîn zî sekban bi. Nê kesan verî Paris de 4 kesanê bînan reyde pêvînayîşî kerdni. Goreyê çimeyanê kurdan polîsê Fransa wina fikirîyenê ke Paris de dîplomatêkî no planê hêrişî kerdo. Tehqîqatê dewa dewam keno.
Aydarî no plan vist vîrî û vat: ''Înan 2011 de dest pê plananê xo kerd û hema zî ê hê dewam kenê. Ganî nê îtîrafî tesîrê dosyaya Qirkerdişê Parisî bikerê. Dewleta tirke bi hawayêkê eşkerayî Paris de qirkerdiş kerd. Tirkîya dewletêka terorîst a. Fransa ganî derheqê Tirkîya de dewa abikera. Ganî sûcdarî vejîyê verê mehkeme. No Qirkerdişê Parisî hetê MÎTî ra ameyo rêxistinkerdene û Anqara fermanê ci dayo.''
