Bi fermanê Wezîrê Karanê Zereyî Horst Seehoferî Weşanxaneyê Mezopotamya û Mîr Muzîk 12’ê Sibate 2019 de ameybî qedexekerdene. Polîsan eynî roje eştîbî serê her di sazgehan û berê sazgehan mor kerdîbî. Serra parî polîsan di reyî eştîbî serê nê di sazgehan û kitabê musnayîşê Kurdkî, kitabê domanan ê bi Kurdkî û kitabê tarîxî zî tede dest naybî serê xeylî kitaban.

Menga Tebaxe de bajarê Hambûrgî yê Almanya ra Unrast-Verlag, Awusturya ra Manelbaum Verlag û Swîsre ra Edîtîon 8, nê hîrê weşanxaneyan semedê paştdayîşê Weşanxaneyê Mezopotamya dest bi kampanyayêk kerdebî. Kampanyaya ke bi nameyê ‘Vera sansûrî paştdayîş û projeyê azadîya weşanî’ ameye destpêkerdene de her hîrê weşanxaneyê wazenê ke kitabê Mezopotamya yê ke hetê polîsan ra ameyî destsernayene înan ra tayînan newe ra bi nameyê‘ Edîtîon Mezopotamya‘ bidê weşanayene Ame zanayene ke her hîrê welatê ke Almankî yena qiseykerdene  de kampanya rê zaf eleqadarî esta. Organîzatoranê kampanya ra Weşanxaneyê Manelbaûmî da zanayene ke pereyê ke destê înan de mendî ê do seba  mesrafê deweya  Weşanxanxaneyê Mezopotamya xerc bikerê.Yeno plankerdene ke kitabê ke semedê şiknayîşê sansûrê Almanya ameyî weşanayene do biresê Fûarê Kitaban ê Mîyannteweyîyî yo ke do 16‘ê Teşrîna Peyêne de bêro destpêkerdene.

Wa Kurlturê Kurdan rê Hurmet Bêro Ramojnayene

Paştgêranê kampanyaya ra yewe zî Vervatoxê Kulturî ya Partîya Çepe ya Almanya Sîmone Barrîentos a. Barrîentosa ke medyaya sosyale ra semedê paştdayîşê kampanya veng dana waşt ke wa Waşanxaneyê Mezopotamya têna memano û  ard ziwan ke ganî hukmatê Almanî kulturê Kurdan rê hurmet ramojno. Barrîentose vat  kulturê Kurdan û mucadeleyê azadîye yê Kurdan pabesteyê yewbînanê û bale ante kitabanê ke derheqê naye de hetê Weşanxaneyê Mezopotamya ra ameyî weşanayene ser. Barrîentose kultur û muzîkê  Kurdan sey leteyêkê  kulturê Almanya hesibna û va:‘‘ Pawitişê nê kulturî  berpirsîyarîya ma ya sîyasîye ya. Bi qedexeyê Hukmatê Federelî na berpirsîyarîye nêameye caardene û heman wextî de heqê azadîyê fikiryayîş û weşanî yê esasî yê Qanûnê Bingeyênî zî ameyî bipaykerdene.‘‘ Barrîentose kampanyaya paştdayîşî ya ke hetê  Almanya ra Unrast-Verlag, Awusturya ra Manelbaum Verlag û Swîsre ra Edîtîon 8 ra ameya destpêkerdene vist vîrî û semedê paştdayîşî veng da.

Kitabheskerdoxî eşkenê nê hesabî ser ra paştî bidê nê projeyî:

Verein z. Forderung kurdischer Kultur e.V. i.Gr.

IBAN: DE78 4306 0967 1011 1214 00

Verwendungszweck: Edition Mezopotamya