Finlandiya 2019 de seba ke hêrişê Rojawanî kena, semedê Tirkîya qerarê amborgoyê çekan girewt. Wezîrîya Pawitişî ya Finlandiya no qerarê xo wedarit. Naye ser o aktvîstanê RiseUp4Rojava paytext Helsinki de verê bînaya Wezîrîya Pawitişî de çalakîye kerde.

Kurdîstanijî û dostê înan zî tewrê çalakîye bîyî. Çalakwananê ke beyraqê PKK, YPG û YPJ kiriştî bi sloganan hêrişê dewleta tirke û paştgêrîya welatanê Ewropa protesto kerdî. Eşkerayîye de seba ke Finlandiya semedê endamîya NATOyî tawiz dana Erdoganî ameye sûcdarkerdene û ame vatene ke nîno qebulkerdene ke Finlandiya û Swêd semedê endamîya NATOyî aktîvîstanê kurdan teslîmê Tirîya kenê. Çalakîye de veng dîya Finlandiya ke wa vera bazarîya leymine ya Erdoganî heqanê demokratîkan ra tewîz medo.

Badê eşkerayîye wedaritişê ambargoyê çekan pê sloganan û vilakerdişê vilawekan ame protestokerdene.